Яшавда савлукъдан алда дагъы башгъа гьеч зат ёкъдур. Оьзюнг яда ювукъ адамынг авруса, бек талчыгъабыз. Озокъда, авругъанда докторлагъа да харлы болабыз, олардан кёмек умут этебиз. Аврумайгъанлагъа Аллагь дагъы да савлукъ берсин, авруйгъанлагъа да Тенгирим себебин къаршы этсин!
Барыбыз да билеген кюйде, докторну касбусу – лап да сыйлы касбуланы бириси. Минг макътав болсун акъ халатлы, эмли къоллу врачлагъа, медсестралагъа! Мен оьзюм де яшдан берли медсестраны касбусун кёп ушатып танглагъанман. Эрпелидеги школада медицина кабинетге ёлбашчылыкъ этемен.
Шу макъаламны яза туруп, медицина тармакъда гьалал къуллукъ этеген врачлагъа баракалламны билдирмеге сюемен. Уьягьлюм Илмутдин артдагъы вакътилерде аркъасюеги авруп, кёп инжинди. Къайда да бардыкъ докторлагъа гёрсетмеге. Бир тюгюл, эки керен операциялар да этмеге тюшдю. Биринчи операциябыз тюзевлю болмады. Ондан сонг Магьачкъаладагъы И.Ш.Исмайыловну атындагъы медицина центргъа ятма токъташдыкъ. Аллагьны яхшылыгъындан, квота да тюшдю, бек билеген докторлагъа да къаршылашдыкъ. Гьасили, январ айны ахырында шо клиникада ятып, сынавлу врач, нейрохирург, къумукъ улан Магьамматрасул Абдуллаев эрим Илмутдинге операция этди. Аллагь рази болсун огъар, къолай болуп, бир жумадан уьйге де чыкъдыкъ.
Оьзюню ишин бек билеген Магьамматрасулну гьакъында айрыча айтмагъа сюемен. Ол Тёбенкъазанышда тувгъан, мундагъы школаны битдиргенде 2001-нчи йылда Магьачкъаладагъы медицина академиягъа тюшюп, шону лап яхшы къыйматлагъа охуп чыкъгъан. Ондан сонг ординатураны да уьстюнлю кюйде тамамлагъан, тыш пачалыкълардагъы белгили клиникаларда сынав алгъан. Охуй туруп, ол нейрохирургияны халкъара центрында ишлеген, мундагъы сав дюньягъа аты айтылгъан белгили врачлардан нейрохирургияны сырларына тюшюнген. Медицина илму булан да машгъул. Гьали буса ол Исмайыловну атындагъы клиникада неврология-нейрохирургия бёлюкню заведующийи.
Ону йимик сынавлу докторлар бары — бизге уллу яхшылыкъ. Магьамматрасул Набиевич Абдуллаев къазанышлы къумукъ улан экенни билгенде, мен дагъы да бек сююндюм. Бизин миллетни арасында шолай бажарывлу къумукъ уланлар кёп болсун, я Аллагь!
Баракалла сагъа, Магьамматрасул! Ону булан бирче шо бёлюкде ишлейген медсестралар Саният Мамаевагъа, Зугьра Гьажибековагъа да гьакъ юрекден разилигибизни билдиребиз. Аллагь рази болсун сизге!
Шу сёзлени де огъар багъышлайман:
Аллагь уллу пагьмуну
Берген Магьамматрасулгъа!
Оьмюрюнг узакъ болсун,
Къуллукъ этме халкъынга!
Берекетли яшавунг
Уьлгюдюр инсанлагъа.
Баракалла ишинге —
Парахатлыкъ дюньягъа!
Асият АТАЕВА,
Эрпели юрт.
