Буйнакск райондагъы билим берив ожакъланы охувчулары «Солдатгъа кагъыз» деген гьаракатда кёп сююп ортакъчылыкъ этелер. Гьали-гьалилерде Тёбен Къазанышдагъы 2 номерли орта школаны 6-нчы класыны охувчу къызы Насиба Зайнутдинова язып йиберген кагъыз къолуна тюшген асгер къуллукъчу Агьмат Магьамматов булан исси шартларда оьтгерилген ёлугъув шогъар нече де арив шагьатлыкъ эте.
Къысгъа болжаллыкъ отпуск берилип уьюне гелген асгер къуллукъчу Агьмат кагъызны язгъан Насиба булан ёлугъуп, огъар гьакъ юрекден разилигин билдирмеге токъташа.
Насибаны клас ёлбашчысы, Украина бойда юрюлеген хас асгер гьаракатда игит кюйде жан берген, Къоччакълыкъны ордени булан савгъатлангъан Сайкумов Магьачны анасы Хадижат Сайкумова булай бек уллу агьамияты бар тарбиялав ишге айрыча тергев берип янашагъанлыкъ да маънасыз тюгюл.
Насиба таныш да тюгюл асгер къуллукъчугъа кагъызын язып йиберегенде, озокъда, ону булан ёлугъуп гьакълашма тюшер деп умут да этмей болгъандыр. Кагъызын да ол шулай ёравлу сёзлер булан башлагъан:
«Сизге къайнар салам! Мени кагъызым кимге сама да тюшер экен, балики етишмей къалмагъа да ярай…»
Оьр Жюнгютей юртдан барып Украина бойда юрюлеген хас асгер гьаракатда ортакъчылыкъ этеген Агьмат учун Насибаны кагъызы уьйден гелген бир сыйлы савгъат йимик болуп токътай.
Сав клас булан оьтгерилген ёлугъувну барышында Агьмат Магьамматов Ватандан арекде къуллукъ этегенлер, оьзлени атына гелген гьар кагъыздан, гьар сююнчлю хабардан къуванагъанын, шолай ёравлар олагъа уьстюнлюк алып къайтма ругь берегенин билдирген.
«Бизге шулай кагъызлар язма чола табып, йиберегенигиз учун кёп савболугъуз. Бир де эринмей яза туругъуз. Сизин ёравларыгъызбизге етише, оланы гьарисине жаваплар язма болмасакъ да, кёп сююп охуйбуз, бизин эсгерегенни англап оьктем де болабыз», — деп хабарлай Агьмат.
Агьмат Магьамматов охувчулар булангъы ёлугъувунда гьар яшёрюм асгерде къуллукъ этме, Ватанны якълама гьазир болуп турма гереклигин айта туруп, асгер къуллукъчулагъа тергев берип, оланы гьайын этип чалышагъан Дагъыстан Республиканы Башчысы Сергей Алимовични, Буйнакск район администрацияны башчысы Уллубий Магьамматовични атларын разилик булан эсгерген.
– Бизин, асгерде къуллукъ этегенлеге аркъа таяв болуп сизин йимик инамлы наслулар токътагъан сонг уьстюнлюк бизинки болажакъ, – деген ол.
Булай ёлугъув болар деп бир де къаравулламагъан Насиба: «Инанып да битмеймен. Асгердегилеге кагъыз язагъанлар нече де болгъандыр. Мени кагъызым тюшген адам булан ёлугъув оьтгермек уллу насип тюгюлмю дагъы!..» – деп сююнегенин яшырмай.
Школаны директору Патимат Мугьутдиновна охувчу къызны кагъызына сесленип ёлугъувгъа гелген Агьмат Магьамматовгъа баракалла билдирген ва огъар асгер Макътавлугъуну китабын савгъат этген.
Казим КЪАГЬРУМАН.
СУРАТДА: Насиба Зайнутдинова Агьмат Магьамматов булан ёлугъувда.
