Белгили экени йимик, бу йыл март айны 15-нден 17-сине ерли Россия уьлкебизде Президентни сайлавлар оьтгерилежек. Шо уллу агьвалатгъа байлавлу гьалиденокъ бизин республиканы районларында жыйынлар оьтгериле, гьазирлик гёрюле.
Шолай, алдагъы гюнлерде Къарабудагъгент районну администрациясында сайлавлагъа байлавлу жыйын оьтгерилген. Шонда районну территория сайлав комиссиясыны председатели Нажмутдин Гьасанов сёйлеген. Бизин уьлкебиз учун бу сайлавланы агьамиятлылыгъы, кёп уллу маънасы барлыгъыны гьакъында айта туруп ол гьар ерде сайлав комиссиялар оьзлени ишин башлагъанны билдирген.
«Бизин районда 33 сайлав комиссия иш гёре. Программабызгъа гёре феврал айны 17-синден март айны 7-си болгъанча сайлавчулагъа гьарисине сайлавлар не ерде болажагъын, къайсы гюнлер болажагъы гьакъында герти маълуматланы билдирмек учун 137 къуллукъчу гьар юртгъа, уьйлерине барып иш гёрежек», – деп къошгъан Н.Гьасанов.
Я. БИЙБОЛАТОВ
