Гетген жумада «Ёлдаш» газетни редакциясында Украина бойда юрюлеген хас асгер гьаракатда ортакъчылыкъ этеген майор Руслан Муратханович Будайханов булан ёлугъув болду.
Руслан Хасавюртда 1985-нчи йыл тувгъан. Ол агьлюдеги 3 уланны гиччиси. Шагьардагъы лицейни охуп битгенде, Санкт-Петербургдагъы Россияны МВД-сини асгер (военный) институтуна тюше. 2008-нчи йылда ол институтну битдире ва Москва областдагъы айрыча хас гьаракатланы кютеген дивизиягъа йибериле.
2017-нчи йылда Русланны Магьачкъалагъа чыгъара ва Россияны милли гвардиясыны 102-нчи бригадасыны батальонуна ротаны командири этип белгилей. Гьали батальонну штабыны начальниги болуп асгер къуллугъун давам эте.
Донбасда хас асгер гьаракат башлангъандокъ, Руслан къуллукъ этеген батальонну шонда йибере. Россиягъа янгы къошулгъан регионланы адамларыны аманлыгъын сакъламакъ учун батальонну Запорож бойгъа сала. Гьаракатны биринчи гюнлеринден тутуп Руслан намуслу кюйде салынгъан борчланы кюте. Батальонну штабыны начальнигине этме герек кёп ишлени ол заманында ва тындырыкълы кюте.
Шолай бир керен миллетчилени атышыв гючлери Бердянск шагьаргъа ракеталар булан атыша. Кёп ер бузула, шагьарны боюндагъы портгъа да гюч бола. Шондагъы зараллангъан адамланы къутгъармагъа деп Руслан Будайханов къуллукъ этеген батальон йибериле. Руслан оьзю яллап турагъан уьйлерден 18 адамны чыгъарма бажара.
–18 адамны чыгъардым, тек шоланы экевю оьлдю, 22 йыл болагъан жагьил яш чы къолумда жан берди, – деп хабарлай Руслан.–Батальон оьзюне салынгъан борчну уьстюнлю кюйде кютдю.
Шо игитлиги учун батальонну асгерчилери савгъатлангъан, Руслан Будайхановгъа буса «За отвагу» медаль берилген.
Бу Русланны биринчи савгъаты тюгюл, ол асгерде къуллукъ этген чакъы заманны ичинде «За отличие в службе» деген медалны толу кавалери, шолай башгъа белгилери де бар.
Мен нече керен де хас асгер гьаракатда ортакъчылыкъ этегенлер булан ёлукъгъанман, олар аз сёзлю адамлар, берилген соравлагъа да толу кюйде жаваплар алып болмай къалабыз. Тек бир зат ачыкъ, олар оьзлеге салынгъан борчну намуслу кюйде кютелер.
Батальон тапшурулгъан борчланы кюте тутуп, Мариуполь шагьарда да болгъан, гьали Донбасда.
Руслан Будайханов Уллу Ватан давну ортакъчысы, хасавюртлу Ниъматулла Исаевни торуну бола. Ону сёзлерине гёре, гьар жумада уллатасы булан телефон сёйлей, бу йыл ветерангъа 100 йыл битежек.
Руслан отпускада эди. 21-нчи январда ол Росгвардияны къуллукъчусу болуп турагъан агьлюсю Зайира, 1 къызы ва 3 уланы булан савболлашып, янгыдан Донбас бойгъа гетди.
Огъар «таман асгерде къуллукъ этгенинг» дегенлер де бар, ол буса «уьстюнлюк алмай туруп къайтмасман» деп тутгъан, неге тюгюл ону уллутасы Ниъматулла да 80 йыл алда немислени дагъытып къайтгъан. Биз де Руслангъа уллатасына ошап, уьстюнлюкню де алып, эсен-аман уьюне къайтмакъны ёрайбыз!
Гебек КЪОНАКЪБИЕВ.
