Москвадагъы Тверск район суд дагъыстанлы Магьаммат Дагьировгъа къаршы гьукму чыгъаргъан.
М.Дагьиров тутулгъанча тахшагьарны полиция бёлюклерини бирисинде къуллукъ эте болгъан. Оьтген йылны ноябр айында огъар ерли банкирге байлавлу ахтарывлар юрютмек тапшурулгъан. Тек тергевлени оьтгермей, банкирден 50 минг долларны талап этген. Сонг – урушбат алагъан вакътисинде тутулгъан.
Район суд алдагъы полицейскийни 11 йылгъа эркинликден магьрюм этмек деп тёре гесген. Уьстевюне, М. Дагьировгъа пачалыкъгъа 100 миллион манат къоду тёлеме тарыкъ. Ол шо борчдан къутулмакъ учун, Москвадагъы эки уьйлюк квартирин сатмагъа токъташгъан.
Алав АЛИЕВ
