Бу йыл «Таза сув» деген федерал проектни дазуларында бизин республикада яшайгъанланы ичеген сув булан таъмин этмек муратда 5 объект къурулуп пайдаландырывгъа берилежеги мекенли болуп битген, — деп билдире дагъыстанны коммунал хозяйстволарыны управ-лениесини ёлбашчысы Осман Агьматов.
Шо объектлени арасында Къазбек райондагъы Дылым юртну халкъын уьзюлмей сув гелеген быргъыланы системасы булан таъмин этмек биринчилерден санала.
Экинчилей де, «Чиркей-Буйнакск» деген сув юрюйген быргъыланы толу кюйде янгыртып, кёп сув сыягъан уллу оьлчевлюлерин къурашдырмакъ гёз алгъа тутулгъан. Шо ишлер тамамланма ювукъ болуп да тура. Ону да уьстевюне Буйнакск шагьарны ичиндеги эсги болуп таза дегенче дёнген-битген сув быргъыланы ва имаратланы да янгыртып къурма тюше.
«Къыбла-Сухокумск» шагьарны ватандашларын ичеген сув булан таъмин этмеклик де шо уллу агьамияты бар проектни гёз алгъа тутулгъан уьчюнчю бёлюгю гьисаплана. Ахвах районну Карата юртунда яшайгъанланы ичеген сув тартып толу таъмин этив де проектни яшавгъа чыгъарылажакъ дёртюнчю тирети бола.
Акъташ оьзенден Къазбек районну Алмакъ, Буртунай, Дылым, Гуни, Къозтала, Инчхе юртларына да сув тартылажакъ.
Эсгерилген пачалыкъ программаны алдына салынгъан талаплагъа гёре 2024-нчю йылда дагъы да эки имаратны къурулуш-къурашдырыв ишлерин битдирип пайдаландырывгъа бермек гёз агъа тутула.
«Таза сув» деген программаны яшавгъа чыгъарывда бизге бир къадар яхшы натижалагъа етишме бажарылгъанын да айтмай къоймагъа кюй ёкъ, — дей Осман Агьматов юрюлюп турагъан ишлени асувлулугъун такрарлай туруп, — Шолай 2020-нчы йыл биз янгыз бир имаратны къуруп пайдаландырма болгъан эди бусакъ, 2021-нчи йыл – 6, 2022-нчи йыл буса – 8 имаратны къуруп къоллавгъа бердик.
2024-2026-нчы йылларда да яшавгъа чыгъарма деп сув булан таъмин этме болагъан 26 объектге гёре таклифлер гьазир этилип йиберилген. Биз оьрде айтып гетген чакъы ишлени къурашдырып пайдаландырывгъа берсек республикада яшайгъан 500 мингден къолай адамны ичеген таза сув булан таъминлигин болдурма бажарыла.
К. КЪАГЬРУМАН.
