Алдагъы гюнлерде «Дагестан» деген маълумат агентлигинде республикадагъы кёп къабатлы яшавлукъ уьйлерде ва социал къурумларда иссилик беривге гьазирликни айланасында прес-конференция оьтгерилди.
ДР-ни яшавлукъ инспекциясыны ёлбашчысы Сергей Касьяновну айтывуна гёре, бугюнлерде Дагъыстан Республиканы бары да районлары ва шагьарлары иссиликни бермеге 99 процентге гьазир. Тав ва тавтюп бойларда ерлешген районларда яшавлукъ уьйлеге, социал объектлеге октбяр айны 15-нден башлап иссилик берилген. Янгыз Буйнакск шагьарда язда явгъан бузну натижасында чарлакълары бузулгъан 23 яшавлукъ уьйге иссилик бермеге имканлыкъ ёкъ. Шону себеби де ярашдырыв ишлер тамамланмагъанлыкъ-дан. Ярашдырыв ишлер булан машгъул къурумлар ноябр айны 15-нде тамамланажакъ деп билдире.
Иссилик берилмеген яшавлукъ уьйлер Магьачкъала шагьарда да бар. С.Касьянов эсгерген кюйде Магьачкъалада шолай уьйлер 82 бар, ону себеби буса, эсгерилген яшавлукъ уьйлер Дагъыстанны яшавлукъ фондуну Реестрине гирмегенлиги.
Яшавлукъ уьйлеге ва социал къурумланы биналарына иссилик 5 гюнню узагъында 8 градусдан артыкъ тюгюл буса, сезон башланмагъанына да къарамайлы бериле. Иссилик берилген сонг уьйдеги гьава 19-20 градусдан кем болмагъа тюшмей.
Сергей Касьянов уьйлердеги иссиликге ва башгъа масъалалагъа байлавлу разисизликлени, ёравланы язмагъа ва пайдалы маълуматланы билмеге Госуслуги.Дом деген сайтны къолламагъа таклиф этди.
Бизин мухбирибиз.
