Инг де абурлу, къыйматлы ва пайдалы касбуланы бири,  озокъда,  муаллимни касбусудур. Гьар йыл октябр айны 5-нде муаллимлени байрам Гюню оьтгериле. Охувчулар, ата-аналар шо гюн гюл байламлар, савгъатлар, исси сёзлер булан муаллимлеге оьзлени баракалласын, разилигин ва сюювюн малим этелер. Охув ожакъларда муаллимлеге багъышлангъан шатлы чаралар, концертлер  ва савгъатлавлар оьтгериле. Бир бир школаларда да 11-нчи класланы охувчулары шо гюнгю дарсланы оьтгермекни оьзлени бойнуна алып муаллимлерине ял алмагъа имканлыкъ бере. Булай чаралар  барысы да кёп йылланы узагъында юрюле туруп мердешге айлангъан.

 

Бу йыл октябр айны 5-нде муаллимлени Гюнюнде ва насигьатчыны йылында Магьачкъала шагьардагъы орус интеллигенцияны мемориалыны майданында муаллимлени тухумларыны аллеясыны ачылыву болду. Шолай да гележек наслулагъа эсделикге насигьатлар язылгъан бокъча ерлешдирилди. Эсгерилген бокъча 50 йылдан оьтген сонг ачылажакъ.  Бу чарада Дагъыстан Республиканы  билим беривге ва илмугъа къарайгъан министри Ягьия Бучаев де ортакъчылыкъ этди.

Муаллимлени тухумларыны аллеясында билим беривню оьсювюне этген къошумуну эсделигине гьар тюрлю тереклер орнатылды.  Бу чарада билим берив тармакъда чалышагъанлар да, охувчу яшлар да ортакъчылы­гъын болдурду ва  оьзлени къошумун этди.

Ягьия Бучаев оьзюню сёйлевюнде:

– Бизин муаллимлерибизге абур да, гьюрмет де тийишли. Айрокъда муаллимни ва насигьатчыны йылында оланы эсделигин сакълап, оьсюп гелеген яш наслуну тарбиялавда, олагъа умуми билим беривде этген къошумун даимлешдирмекни терен маънасы бар, – деди.

Муаллимлени тухумларыны аллеясы йыл са­йын оьсежекге ва муаллимлеге разиликни, гьюрмет этивню белгиси болуп токътажакъгъа шек­лик ёкъ. Шо гюн эсгерилген аллеяны ачылывуну вакътисинде Магьачкъала шагьардагъы билим берив ожакъланы муаллимлерине баракалла кагъызлар, гьюрметлев грамоталар ва башгъа савгъатлар да тапшурулду.

 

П.БЕКЕЕВА.