Буйнакск районда ерлешген Тёбен Къазаныш республикабызда чы нечик де, гьатта савлай Темиркъазыкъ-Кавказ федерал округунда оьзюнде лап да кёп халкъ яшайгъан ва бай тарихи булангъы юртларыбызны лап да гёрмеклиси гьисаплана. Белгили болгъаны йимик, кёп адамлары булангъы ерде-отавда яшавлукъ-экономика масъалаланы ёрукълашдырыв да агьамиятлы. Ерли экономиканы оьсдюрюв булан яшавлукъ шартлар, онгайлы къуллукълар болдурулагъанын алдан берли топлана гелген сынав ачыкъ этип гёрсете.
Айтмагъа сюегеним, алдагъы «Карантай» къуш фабрикде этилинген натижалары айлана якъдагъы къоллавчуланы талапларын яшавгъа чыгъарывгъа лайыкълы къошум болдура эди. Муна алда етишилген уьстюнлюклери булан дазуланмайлы, гьали де къуш этни оьсдюрювге тергев артмагъа башлагъаны гьакъда разилик булан эсгермеге герек. Ерли далапчыланы сиптечилиги ДР-ни Гьукуматыны башчыларыны янындан якълав-кёмек табагъаны гьакъда да айрыча эсгермеге тюше.
Бугюнлерде ДР-ни юрт хозяйство ва сурсат министри Мухтарбий Ажеков ишчи сапары булан эсгерилген районгъа баргъан ва агьамиятлы сурсат программаны оьлчевюнде юрюлеген инвестиция проекти булан ювукъдан таныш болгъан.
«Буйнакский птицепром» деген ихтиярлары дазуландырылгъан акционер жамият къушлар сакъланагъан янгы къураллар булан ясандырылагъан 30 уллу къуш бина къурмагъа ва пайдаландырывгъа бермек учун 1 миллиард акъча маяларын харжлавгъа салмагъа токъташгъан.
Шонда бир вакътини ичинде эт учун оьсдюрюлеген 500 минг бройлер тавукъланы сакъламагъа имканлыкълар болдурулажакъ деп къаравуллана. Шолайлыкъда, йылда 2,5 минг къуш оьсдюрюп, къоллавчуланы пайдалары учун йылда 7 минг тон эт болдурмагъа умут этилине.
– Къушчулукъ тармакъны асувлулугъун артдырывгъа байлавлу болуп Буйнакск районда алдан берли бай сынав топлангъаны гележек учун да инамлыкъны тувдура, – деген Мухтарбий Къошманбетович оьзюню ишчи сапарындан къайтывунда. – 2024-нчю йылда уллу къуш биналаны 18-ин къуруп пайдаландырывгъа бермеге гёз алгъа тутулгъаны гьакъда да айырча эсгермеге тюше. Юрт хозяйство къуллукъчулар ДР-ни Башчысы Сергей Меликовну сурсат аманлыкъ учун юрюлеген гьаракатына оьз ишинде аслам къошумун болдурмагъа токъташгъан. Къуш этни оьсдюрювге тергев арта. Шолайлыкъда, гележекде янгы къуш фабрикде республикабызны къоллавчуларыны 7 процентин къуш эт булан таъмин этмеге имканлыкълар яратылажакъ ва 100 адамгъа янгы иш ерлер ачылажакъ.
Къ. КЪАРАЕВ.
