Оьтген къаттыгюн, октябр айны 8-нде, Уллу Ватан давну вакътисинде Кавказны азатлыгъы учунгъу урушда къазанылгъан уьстюнлюкню 80 йыллыгъына багъышлангъан чара белгиленди. Эсгерилген чара Дагъыстанны гьалиги Къазбек районуну Аркъабаш деген еринде оьтгерилди ва ДР-ни Башчысы Сергей Меликовну тапшурувна гёре яшавгъа чыгъарылды. Шонда Дагъыстан Респуб-ликаны Гьукуматыны Председатели Абдулмуслим Абдулмуслимов, ДР-ни Башчысыны ва Гьукуматыны администрациясыны ёлбашчысы Алексей Гьасанов, шагьарланы, районланы башчылары, жамият къурумлар, яшёрюмлени патриот гьаракатларыны вакиллери, хас асгер гьаракатны вакиллери ортакъчылыкъ этдилер. Шо гюн Аркъабашда 5 минг адам ортакъчылыгъын болдургъаны да белгили.
Кавказ учунгъу урушланы эсделик чарасы юрюлген ерде милли майданлар, гьалиги савутланы ва дав техниканы выставкасы да ерлешдирилген эди. Оланы арасында бугюнлерде хас дав гьаракатда къолланагъан техника да бар эди.
А.Абдулмуслимов фестивалны ача туруп Кавказны азатлыгъы учунгъу уруш 442 гюн юрюлгенин ва Уллу Ватан давдагъы агьамиятлы урушланы бириси болгъанын эсгерди ва Сергей Меликовну къутлав сёзюн охуду.
–Миллетчи Германияны стратегия хыялларында Темиркъазыкъ Кавказ инг де агьамиятлы ер болгъан, – деп язылгъан С.Меликовну къутлав сёзюнде. — Тек Кавказ тавлар душмангъа бойсынмагъан. Фашистлер бизин игит, къайратлы халкъны уьстюнлюкге инанывуну алдында артгъа тартылгъан. Бугюн Гюнбатыш Европа уьлкелер бир болуп СССР-ни халкъларыны экинчи дюнья давдагъы игитликлерин болмагъандай ёкъ этме, тарихни янгыдан язмагъа къаст этеген вакътиде яшёрюмлер 1942-нчи йылда Дагъыстанда 91-нчи атышывчу Мелитополь дивизия амалгъа гелгенин ва 27 минг дагъыстанлы къоччакълар «Кавказны душмандан къоруву учун» деген медаль булан савгъатлангъанын билмеге герек.
Россияны асгерлери, уьстюнлюкню есилерини наслулары, гьар гюн, гьар сагьат хас асгер гьаракат юрюлеген бойларда неонацистлер ва миллетчилер булан ябушувда оьзлени тавакаллыгъын, тартынмайгъанлыгъын исбат эте.
Фестивалны ортакъчыларына «Кавказны азатлыгъы учун уруш» деген дав-тарих реконструкциягъа къарамагъа имканлыкъ берилди. Ахырда Къызыл Армияны асгерлери немис-фашистлеге къаршы Кавказ урушланы агьвалатларындан эпизодлар да гёрсетилди.
П.БЕКЕЕВА.
