Мердешли кюйде, гьар йыл, къоркъмаскъалалылар атын юртгъа къойгъан, оьзюню аты сав дюньягъа белгили Жалалутдин Къоркъмасовну тувгъан гюнюн октябр айны башында оьтгере. Шону да, инкъылапчы, Дагъыстан гьукуматыны биринчи башчысы, ахырда халкъны душманы деп, гюллелеп оьлтюрюлген Ж. Къоркъмасовгъа салгъан эсделикни алдында белгилей. Тувгъан гюнюне гелген алимлер, язывчулар, муаллимлер, школаланы охувчулары, юртлулар докладлар этип, йырлар йырлап, шиърулар охуп, Жалалутдин Къоркъмасовну Дагъыстан халкълары яхшы яшасын учун этген ишлерин эсгерелер.
Район администрацияны, районну маданият управлениесини ва юртлуланы гьаракаты, сиптечилиги булан октябр айны башында Къоркъмасов тувгъанлы 146 йыл битегенине байлавлу жыйын оьтгерилди. Адатлы гьалда, жыйынгъа район администрацияны ва Къоркъмаскъала юртдагъы школаланы охувчулары гелген эди.
Жыйынны ачма Хумторкъали район администрацияны башчысыны заместители Жамалутдин Юсуповгъа сёз берилди. Ол Къоркъмасовну яшаву ва жамият чалышыву гьакъда айта туруп, инкъылапдан сонг бузулгъан-тозулгъан Дагъыстанны аякъгъа миндиривдеги къоччакълыгъы, игитликлери гьакъда мисаллар гелтирип хабарлады.
Сёз берилген Къоркъмасовну алда республика фондуну председатели болуп тургъан Гьусейн Адилов фондну ишин юрютювге байлавлу этген гьаракаты гьакъда къысгъача айтды ва фондну ишин оьзюню савлугъу себепли болуп юрютмеге болмайгъанын англатды. Ол шону Солтанали Солтаналиевге тапшурмакъны тийишли гёрдю.
Однан сонг сёйлеген Солтанали Солтаналиев ону гьакъында узакъ хабарлап турмай, торкъалили Дагъыстанны биринчи халкъ шаири Айбала Дадавну Жалалутдинге багъышлангъан шиърусун охуду.
Къоркъмасовну жыйынына чакъырылгъан Бурлият Ибрагьимованы атындагъы фондну директору. Сакинат Магьмутова узакъ йылланы боюнда намуслу иши, оьр даражадагъы пагьмусу, тапшурулгъан ишлени сан янлы кютегени учун белгили пачалыкъ чалышывчубузну тувгъан гюнюн белгилевде гьаракат этип айлангъанлагъа Баракалла кагъызлар ва медаллар тапшурду. Оланы арасында райондагъы Яшавлукъ фондну ёлбашчысы Зумурут Гьажакъаева, Умзагьрат Идрисова, Абидат Абулашова, Умлайла Бадирибова, Сайида Къойчакъева, Найида Тетекъаева бар.
Жыйында чыгъып сёйлегенлерден загьматны ветераны Абдулгьамит Алиев Къоркъмасовну яшаву ва яратывчулугъу гьакъда тындырыкълы кюйде доклад этди. Ленингентдеги лицейден гелген яшлар жыйынгъа бек арив гьазирлик гёрген эди. Къоркъмаскъаладагъы бир номерли школаны охувчуларыны жыйынгъа гьазирлиги де гьар йыл оьр даражада бола. Олар бу йыл да арив гьазирлик гёрген эди.
Дагъыстанны Халкъ шаири Агьмат Жачаев Къоркъмасовну гьакъында айта туруп, бир шиърусун охуду. Хумторкъали райондагъы «Бирикген Россия» партияны секретары Магьаммат Темирханов жыйылгъанланы къурчун къандырар йимик Жалалутдинге багъышлангъан шиърусун чебер охуп алды.
«Сарихумну» бийивлери къаравчуланы гьар заманда да рази къалдыра. Бу гезик де яшлар бир бийивю булан къаравчуланы сююндюрдю.
«Торкъали» хорну ортакъчыларыны, Дагъыстанны халкъ артисткасы Хадижат Ибрагьимованы, йыравлар Амина Бамматованы ва Умлайла Бадирибованы йырлары Къоркъмасовну жыйынына байрамча тюс берди.
Жават ЗАКАВОВ
