Итнигюн, 2-нчи октябрде, Дагъыстанны Гьукуматыны пред-седатели Абдулмуслим Абдулмуслимов, орунбасары Муслим Телякъавов, Дагъыстанны маданият министри Зарема Бутаева, маълумат ва печат агентлигини ёлбашчысы Абдуразакъ Жамалутдинов Белорус Республиканы маданиятыны министри Анатолий Маркевич булан ёлугъув оьтгерген.
Эки де якъгъа пайдалы маданият агьамияты бар масъалаланы гьакъында лакъыр болгъан, озокъда, Дагъыстанны халкъ шаири Р.Гьамзатовну 100 йыллыгъына байлавлу чаралар оьтгеривню гьакъында да лакъыр юрюлген.
Белорус Республиканы маданиятыны министри А.Маркевич эки де республиканы арасындагъы бирлешип этилинген ишлер пайдалы болургъа ва гележекде тыгъыс аралыкълар юрютме имканлыкъ бережекге инанагъанын айтгъан.
Белорус Республика Россия булан дос ва нечик къурдашлыкъ юрютме гереклигин савлай дюньягъа гёрсетген. Белорусияда 5 минг дагъыстанлы яшай, олар бары да тармакъларда ишлейлер.
Шондан сонг дагъыстан делегация Минскде литераторланы Уьюнде эки де республиканы шаирлерини яратывчулукъ ахшамында болгъан, Россияны Белорусиядагъы элчиси Борис Грызлов, сонг республиканы дин ва милли масъалалагъа къарайгъан вакили Александр Румак булан ёлукъгъан. Сонг олар Белорус пачалыкъ филармонияда Дагъыстандан гелген белгили коллективлерини концертинде ортакъчылыкъ этгенлер.
Экинчи гюн Дагъыстандан баргъан делегация 10,5 миллион сакъланагъан китапханасында болгъан, олагъа Р.Гьамзатовну юбилейине чыгъарылгъан китапланы савгъат этгенлер.
