• «Каспий – 2023»

 Алдагъы гюнлерде  бизин республикада мердешли кюйде юрюлеген гезикли «Каспий – 2023» деген  форум оьзюню ишин тамамлады. Ачыкълашдырып айтгъанда, янгыз Темиркъазыкъ Кавказдан тюгюл, бизин уьлкени оьзге шагьарларындан, олай да Донецк  ва Луганск халкъ республикаларындан гелген жагьил уланланы ва къызланы къуршайгъан шо гьаракат сентябр айны 16-сындан тутуп, 20-сына ерли узатылды.

 

Шону барышында яшёрюмлени ва жагьил адамланы  гьар тюрлю тармакъларда, демек, туризмни, торайып гелеген наслуну патриот ругьда тарбиялавгъа байлавлу, шону булан  маълумат къураллары юрютеген ишлерде гёнгюллю кюйде къошулуп жагьлыкъ гёрсетивню ёллары ахтарылды. Шондан къайры да, форумну ортакъчыларыны билимлерини сан янын артдырывгъа ва камиллешдиривге аслу тергев берилди.

Шолайлыкъда, форумну ортакъчыларына бир-бири булан къатнап, къурдашлыкъ аралыкълар  болдурмагъа шартлар  яратылгъандан къайры да, олагъа гьар тюрлю тармакъларда гёрмекли оьрлюклеклеге етишмеге бажаргъан белгили касбучулар булан пикру алышдырмагъа, жамият арада юрюлеген ишлеге гёнгюллю кюйде къуршалып, элине, халкъына не йимик  пайда гелтирмеге болагъаны гьакъда айтылды. Бугюнлерде савлай дюнь­яда, айрыча  алгъанда, Украина бойда тувулунгъан гьаллар гёз алгъа тутулуп,  бизин асруну инг агьамиятлы масъаласы гьисапда миллетчиликни алдын алмакъ учун не къадар иш юрютмеге тюшегени гьакъында да мекенли лакъыр болду.

Шондан  къайры да, оьтгерилген форумну оьлчевюнде  «Биринчилени гьаракаты» деген жамият бирлешивюню ерли бёлюгюню къасты булан  яшланы айрыча тергевюн тартгъан самолётланы гёлемлерини выставкасы  да болду. Шолай, форумну оьлчевюнде яшёрюмлени гьар тюрлю саниятлагъа ва касбуланы юрютювге иштагьландырмакъ учун шартлар яратагъан пикру  алышдырывлар, выставкалар кёп санавда оьтгерилди.

Лап да аслусу, яшёрюмлени ва жагьил  адамланы бир-бир  сиптелерин яшавгъа чыгъармакъ учун 5,7 милион манатны къадарында грантлар гёрсетилди. Бизин  респуб­ликада яшёрюмлени ва жагьил адамланы гёнгюллю кюйде гьар тюрлю гьаракатлагъа къуршавну ёллары белгиленген прог­рамма форумну ортакъчыларына малим этилди. Эсгерилген шо программада айтылагъанда йимик, ювукъ вакътини ичинде «Жагьиллени уьюн» къурмагъа, гьар тюрлю гьаракатлагъа къуршалып жагьлыкъ гёрсетегенлеге  республиканы оьлчевюндеги савгъат токъташдырмагъа гёз алгъа тутула.

Оьтгерилген форумну ахырынчы гюнюнде ону ортакъчылары Дагъыстанны Башчысы Сергей  Меликов ва Россияны яшёрюмлерини ишлерине къарайгъан федерал агентлигини ёлбашчысыны заместители Дамир Фаттахов булан ёлукъдулар. Инг алда олар грантлагъа лайыкълы болмакъ учун гёрсетилген  проектлери булан таныш болду. «Россия – мени тарихим» деген тарихи паркыны къуллукъчуларыны къасты булан Расул Гьамзатов тувгъанлы 100 йыл битегенликге багъышлангъан, олай да Дав макътавлукъну музейи гьазирлеген Уьстюнлюкню Байрагъына байлавлу гьалиги  янгы ясандырывланы къоллап гьазирлеген выставкалагъа къарап чыкъды.  «Къурдашыма – китап» деген гьаракатда ортакъчылыкъ этди.

–  Бугюн  мен оьтгюр пагьмулу, гёз алгъа тутгъан гьар къайсы мурадын да  яшавгъа чыгъармакъ учун  белсенген, жамиятгъа пайда гелтирмек йимик ортакъ муратгъа байлангъан жагьил адамланы арасында экениме бек шатман. Биз сизге,  торайып гелеген  наслуну вакиллерине аркъатаявларыбыз гьисапда герти кюйде инанабыз. Шону булан бирге биз сизге умут да этебиз. Аталардан къалгъан асил адатланы ва мердешлени гележекде юрютмеге, парахатлыкъ яшавну  ва ёрукълукъну ёлуна тюшюп, тувуп оьс­ген элигизни оьсювюн болдурмагъа сизге тарыкъ болажакъ, – деди форумну ортакъчыларыны алдына чыгъып сёйлевюню вакътисинде Дагъыстанны Башчысы Сергей Меликов. Ол оьзюню сёйлевюн  тамамлай туруп, торайып гелеген  наслуну вакиллерине кёп яхшылыкълар ва уьстюнлюклер де ёрады.

Чинкдеси,  «Прибой» деген ял алыв базасында онунчу керен юрюлген «Каспий -2023» форумну барышында  асувлу иш юрютювге, ону  сиптечилерини гьаракаты булан бирге гюнню шавлаларына чайылгъан, аста эшеген елге чалкъынып турагъан денгиз де, туврадан-тувра болушлукъ этип турду деп айтмагъа ярай.

 

Насрулла БАЙБОЛАТОВ.