Арадан оьтген бир йылыны ичинде Россияда юрт хозяйствода сурсат малланы оьлчевлерин ва сан янын артдырмакъ учун юрюлеген загьмат гьаракатда гёрмекли натижалар къолда этилинегени ачыкъ болуп гёрюне. Савлай уьлкебизде болдурулгъан сурсат малланы къадары 2020-нчы йылны багьаларын гьисапгъа алып айтсакъ, 150 миллиард долларгъа кёп болгъаны гьакъда айрыча эсгермеге тюше.

 

Язлыкълар къайтарыла

 

Къоллавчуланы айлана якъдагъы ич ва тыш талапларын гьисапгъа алып бизин республикабызны аграр тармагъыны къуллукъчулары сурсат аманлыкъ  учун юрюлеген гьаракатда борчларына намуслу кюйде янаша.

Язлыкълар бизин республикабызда язбашда 200 минг гектарлагъа ювукъ майданлагъа чачылгъан эди. Бугюнлерде 8 минг гектардагъы харбузну, пастанны ва къабакъны тас этивлерсиз къайтармакъ учун гёрюлеген чаралар да оьз натижаларын гёрсетмей къоймай.

Айтмагъа сюегенибиз, бахча оьсюмлюклени гьар гектарындан орта гьисапда 900 центнерге ювукъ тюшюм къайтарыла ва базарлагъа сатывгъа чыгъарыла.

Савлай республикабызда бу йыл 1 миллион 500 минг тондан кем болмайгъан къадарда авлакъ ниъматланы къайтармагъа гёз алгъа тутулгъан. Шону булан янаша 500 минг тон емиш, 140 минг тон чалтик ва 250 минг тон юзюм къайтармагъа умут этилине. Бугюнлерде республикабызны къыбла бойдагъы районларында юзюмню эрте бишеген жураларыны тюшюмюн къайтарыв башлангъан.

Дагъыстанны темиркъазыкъ боюндагъы Къызлар, Тарумов, Бабаюрт, Ногъай, къыблада Дербент, Къаягент, тавларда Лаваша ва Акъуша, Гергебил, Шамил районларда овощлар, емишлер, юзюм оьсдюрювде топлангъан сынав асувлу кюйде пайдаландырыла.

– Бизин республикабызда болдурулагъан юрт хозяйство маллар ич талапланы яшавгъа чыгъарыв булан дазуланмай, тышдагъы сурсат базарлагъа да ишлей, – дей ДР-ни юрт хозяйство ва сурсат министрини заместители Эмин Шейхгьасанов. – Шо саялы да ич базарларыбызда сурсат маллар багьа олтура деген разисизликлер де тувулунмагъа бола. Шоланы гьисапгъа алып, къыставуллу гьаллагъа ёл берилмесин учун республикада оьсюмлюкчюлюк тармакъда болдурулгъан юрт хозяйство малланы сакълавгъа салагъан, ишлетеген ва сатывгъа чыгъарагъан логистика центрланы къурув давам этилине ва пайдаландырывгъа бериле. Къызлар. Къарабудагъгент, Къызылюрт, Лаваша районларда  шолай агьамиятлы ишге-къуллукълагъа айрыча тергев бакъдырыла.

 

Тёл тюшювню къошуму

 

Дагъыстан Россияда гьайванчылыкъ тармакъда халкъны ва пачалыкъны сурсат аманлы­гъына бойсынып алгъа салынгъан борчларына намуслу кюйде янашагъан юрт хозяйство къуллукъчулары булан танывлу.

Аграр комплексини мердешли къойчулукъ тармагъында етишген уьстюнлюклери айрыча макътавгъа лайыкълы. Айтмагъа сюегенибиз, къойчулукъ тармакъда чалышагъанлар оьз ишинде оьсдюрюлеген къой малланы санавун артдырыв булан дазуланып къалмай, гьар тюрлю оьлчевде оьтгерилеген ярмакю-выставкаларда да оьр савгъатлагъа ес бола.

Бу йылны тёл тюшюв кампаниясы да бизин къойчулар учун къурумлу кюйде тас этивлерсиз оьтдю демеге ярай. Неге десегиз, 3 миллион  700 минг ана маллардан  3 миллион 500 минг къозу алынды ва аман оьсдюрюлюп тура.

– Тёл тюшювню натижалары алдагъы йыл булан тенглешдиргенде бу йыл 2,4 керен кёп болгъаны гьакъда айрыча эсгермеге ярай, – деди ДР-ни юрт хозяйство ва сурсат министри Мухтарбий Ажеков оьзюню баянында. – Дагъыстанлы къойчулар янгыз ич талапланы кютюв булан тамамланмай, уьст­де де эсгерилген кюйде, къой эт ва къой бишлакъ тышдагъы къоллавчуланы базарларында да айрыча якълав таба. Демек, къойчулукъ тармакъда гьазирленеген малланы сан яны шек­ликни тувдурмай.

Бугюнлерде республикабызны бийик тав отлавлукъларында къой-къозулар аманлыкъда авурлукъ алагъаны гьакъда да айрыча эсгермеге тюше. Гележекде де малланы этден-бутдан тюшюрмейли токъ къышлавун болдур-макъ учун гёчювюл гьайванчылыкъны тюзлюк бойдагъы отлавлукъларында ва къотанларында гьазирлик гёрюв чаралар давам этилине.

Гьайван-мал салынагъан аранлар, гётермелер, къойчулар учун ишленген уьйлер ярашдырыла ва къотан хозяйстволаны ювугъунда гьар тюрлю къатты емлер аракълагъа салына.