Газетни асасландыргъан – Мычыгъыш Республиканы милли политикагъа, тыш байлавлукълагъа, печат ва маълумат ишлеге къарайгъан министерлиги. Баш редактору – Альфия Курганова. Чыгъагъан ери – Грозный шагьар.
Газетни макъалалары Мычыгъышда яшайгъан орус, къумукъ, ногъай, месхети, тюрк, татар ва шолай да къырым татар тиллерде болажакъ.
«Тюрк заманны» биринчи номери багьалы кагъызда басылып, ренкли суратлар булан безендирилген. Ону ал бетине Мычыгъыш Республиканы башы Рамзан Къадыровну уллу сураты ва миллетлени дослугъуну гьакъындагъы исси сёзлери салынгъан. Газетни экинчи бети баш редактору, ногъай къыз Альфия Курганованы янгы маълумат къуралны муратлары, масъалалары, хыяллары гьакъдагъы колонкасы ва макъаласы булан башлана. Уьчюнчю бетинде Москвадагъы къумукъ жагьиллени «Оьзден» деген оьз къурумуну ёлбашчысы Рамазан Алпавутну «Оьзден булан умут тувду» деген шо къурумну гьаракатыны гьакъындагъы уллу макъаласы ерлешдирилген.
Газетни 6-нчы бетинде бирдагъы бир къумукъ, филология илмуланы кандидаты Ругьаният Мусаеваны «Сёйле, тилинг ютгъанмысан?» деген макъаласы да бар.
Онда дагъы да тюрк, къарачай-балкъар, ногъай ва орус тилдеги макъалалар да ерлешдирилген.
Газетни этегенлер – бары да яш адамлар. Оланы умутлары уллу, хыяллары хыйлы. Уьстюнлюклер ёрайыкъ!
Мычыгъыш Республиканы ёлбашчылары бизин ва бизге къардаш халкъланы маданият ва оьзге талапларын чечмек учун гьай этегени сююндюрмей болмай. Янгыз бу газетни чыгъарагъаны ва эсгерилген конференцияны оьтгергени булан тюгюл, кёп санавдагъы оьзге тюрлю чаралар булан да. Мычыгъыш Республика оьз гезигинде, ерли тюрк халкъланы кёмегинден пайдаланып, дюньядагъы тюрк пачалыкълар булангъы аралыкъларын да беклешдирме сюегенин яшырмайлар.
«Тюрк заманы» узакъ яшасын!
Рашит ГЬАРУНОВ.
