Тек тазалыкъны болдурувну, юртланы ичинде, юрт ягъаларында тазалыкъны сакълавну масъаласы бир-эки гюн булан чечилип къалагъан заманлыкъ масъалалардан тюгюл. Шо – гьар гюнлюк иш, гьар гюнню талабы.
Янгыз булкъалар оьтгерив булан низамсызлыкъны ва пакарсызлыкъны алдын алмагъа къыйын экени белгили. Шо саялы да гьалны ёрукълашдырмакъ учун Къарабудагъгент районда кёп тюрлю чаралар гёрюле.
МО «Къарабудагъгент район» деген ерли къурулувуну башчысы Къапур Исаев, районну бары да ёлбашчыларын да жыйып, шо масъалагъа багъышлангъан жыйын оьтгерди. Районну администрациясыны башчысы, ону заместителлери де ортакъчылыкъ этген жыйында юрт ерлерде тазалыкъны болдурувну, къурулуш низамны къайдаларын яхшылашдырывну масъалалары арагъа салынды.
Шо жыйында Къапур Исаев тазалыкъ болдурмакъ учун нечакъы чаралар оьтгерилсе де, бугюн районда шо масъалагъа тергев аз болгъаны гьис этилегенин айтды ва оьзю бугюнгю гьал булан рази тюгюл экенин билдирди. Айрокъда федерал ва республика даражалы ёлланы ягъында ерлешген юртланы ёлбашчыларына айрыча тергев берилип, тувра жаваплар талап этилинди.
Шу ишни кютмек – инг башлап юрт администрацияланы борчу, оланы тергевю артмагъа тарыкъ экени бирдагъы керен токъташдырылып айтылды. Оьзюню янындан «Къарабудагъгент район» муниципал къурулувуну башчысы бары да жыйынны ортакъчыларына санитар, къурулуш ва экология гьалны яхшылашдырмакъ учун хас тапшурувлар берди.
Р. МУСАЕВА.
