Июль айны 24-нде Избербашдагъы «Горводоканал» къурумну алдында хыйлы адам жыйылгъан. Ерли жамаат шагьар гьакимиятдан сувну масъаласын тез заманны ичинде чечмекни талап этген. Яйны бу яллавлу гюнлеринде, чакъны иссилиги 40 градуслагъа ерли гётерилегенде, избербашлылар уьйлерине сув гелмейгенинден инжинегени эки жума бола экен. Машинлер булан ташылагъан сув барысына да болмай, тез къолланып да бите. Школаланы ва яшлар бавларын яшланы ата-аналары сувну уллу пластмас шишалар булан сатып алып таъмин эте.
Белгили кюйде, Избербашгъа сув Каспийскидеги кёлден тартылгъан быргъылардан геле. Шагьар администрацияда айтагъангъа гёре, быргъылар бек эсгиленген, иссиликге чыдамай ер-еринден тешилип, авлакълагъа агъылып, сув Избербашгъа етишмей къала.
Шагьар халкъны къувуну Россияны Ахтарыв комитетини председатели Александр Бастрыкинге ерли етишген. Ол комитетни Дагъыстан управлениесини башчысына тергевлер оьтгермекни тапшургъан. Бираз алда управлениени сайтында ерлешдирилген билдиривге гёре, ахтарывчулар Избербаш шагьар администрацияны жаваплы къуллукъчуларына къаршы уголовный иш ачгъан, администрацияда сакъланагъан бир тюрлю до-кументлени чыгъарып алгъан.
Избербашлыланы къыйынлы гьалы Дагъыстан Республиканы Башчысы Сергей Меликовну янындан да тергевсюз къалмагъан. Ол оьзюню Телеграм-каналында: «21-нчи асруда адамлагъа сувсуз турмагъа тюшмей. Озокъда, ерли «Водоканалны» къуллукъчулары чакъ-чакъда бузулагъан быргъыланы тез ярашдырма къарай, тек неге болгъан къувунлу гьалны гьакъында ватандашлагъа заманында билдирилмей, адамлар къазаплангъанча, къар-шылыкъ билдиривлер башлагъанча къарайсыз? Бары да ёлбашчылагъа айтаман: бир тюрлю масъалалар тувулунагъанда, шоссагьат халкъгъа етишдиригиз, оланы яшавун къолайлашдырмакъ учун, тийишли алгъасавлу чаралар гёрюгюз», − деп язгъан.
Каспийскиден Избербашгъа сув быргъылар 40 йыллар алдын тартылгъан. Оланы орнунда янгылары салынмай туруп, Избербашда сувну къытлыгъыны масъаласын чечме бажарылар дегенге инанма къыйын.
