Дагъыстан Республиканы Башчысы С.Меликовну таклифине гёре, Магьачкъаладагъы Елена Исинбаеваны атындагъы стадионну аты алышынажакъ.
Тахшагьардагъы белгили «Труд» деген стадионгъа Олимпия оюнланы эки керен чемпиону Е.Исинбаеваны аты респбуликаны спорт минис-терлигини сиптечилиги булан 2017-нчи йылда къоюлгъан эди. Тюзюн айтгъанда, шо заманда да стадиону атын алышдырыв жамаатны арасында хыйлы соравланы тувдургъан эди. Белгили кюйде, Еленаны атасы Гьажи Гафарович табасаранлы, жагьил заманларында анадаш Хив районундагъы Чувек юртундан Волгоградгъа гёчюп, ерли орус къызъяш булан уьйленген. Олагъа эки къыз тувгъан. Елена уллусу.
Е.Исинбаева не яш заманларында, не спортда уллу даражалагъа етишгенде де, атасыны гиччи Ватанын эсге алып, гьасирет болуп юрюмеген. Биринчилей Дагъыстангъа ол, енгил атлетиканы къоюп, оьзюне 37 йыл болагъан чагъында гелген.
Гьали Олимпия оюнланы чемпиону Испанияны Тенерифе деген отавунда яшай. Онда ону залим уьйлери бар. Интернетде берген англа-тывларында ол оьзюн Россияны тюгюл, бютюн дюньяны ватандашына гьисаплай, бизин уьлке бугюнлерде Украинада юрютеген хас асгер чаралагъа къаршы чыгъа. Бир вакъти Россияны Савутлу Гючлерини спорт клубунда тренер болуп ишлегенин ва майоргъа ерли гётерилгенин гери ура ва Олимпия комитетни халкъара къурумундагъы ишин узатма умут эте.
Жамын чыгъарып айтгъанда, Сергей Алимович стадионну атын алышдырма тарыкъ деген сипте булан арагъа чыкъгъаны негьакъ тюгюл. Ватанына арт бергенлени аты булангъы стадионлар болмагъа тюшмей.
