Дагъыстан Республиканы Гьукуматыны Председателини биринчи заместители Украинадагъы хас асгер чараларда ортакъчылыкъ этген Азамат Мамаев булан ёлукъгъан.
Азамат гиччи чагъында ата-анасыз къалгъан ва яшлар бавунда тарбиялангъан. Гьакъылбалыкъ чагъына етишгенде пачалыкъ огъар айрыча яшавлукъ уьйлер яда квартир бермеге герек эди. Тек Магьачкъалада оьзю йимик айрыча ожагъын къурма гьасирет кюйде къаравуллайгъан нече-нече етим яш болгъан экен. Ол шо пашман сиягьда − 671-нчи.
Яшавлукъ масъалалары ювукъ арада чечилмежегин англап, ол Обороны министерлик булан гёнгюллю кюйде дыгъар байлап, Украинадагъы миллетчилеге къаршы ябушма гетген. Тийишли отпускасын да алып, Дагъыстангъа аз замангъа къайтгъанда, оьзю бек ушатагъан къызъяш булан уьйленген. Гьали олагъа къыз да тувгъан.
Украинадагъы агьвалатлагъа къайтып къуршалгъанда ол авур кюйде яралангъан. Врачлагъа жагьил адамны оьлюмден къутгъармакъ учун, ону бир аягъын гесмеге тюшген. Гьали Азамат таякъларсыз юрюме болмай.
Ёлугъувда Магьачкъала шагьарны башчысы Юсуп Умавов да ортакъчылыкъ эте эди. Руслан Алиев огъар Азамат Мамаевни масъаласын тез арада чечмекни тапшургъан. «Биз Азамат тюшген къыйынлы гьалны гьакъында «Ватанны якълавчулары» деген фондну чакъырывундан билдик
Бу адам бизин парахат яшавубузну якълай туруп, дав майданлардан сакъат болуп къайтгъан. Гьали огъар ва ону агьлюсюне тийишли яшавлукъ шартлар болдурмакъ − бизин борчубуз», − деген Р.Алиев.
А.Мамаевни квартир булангъы масъаласы чечилгенче, ол агьлюсю булан бары да онгайлыкълары бар уьйлерде яшажакъ. Шону толу йыллыкъ гьагъын дагъыстанлы далапчыланы бириси тёлеген. Ону аты аян этилмей.
