Бабаюрт районда къатты емлени топлав къурумлу юрюле. Район администрацияны юрт хозяйство управлениесинде билдирген кюйде, бугюнге районда 9 мингден де къолай гектардагъы бичен чалынып, аракълагъа салынып битген. Районда жыйылгъан биченни оьлчевю 36 минг тоннадан оьтген.

 

Районну сабанчылары ва ижарачылары тезден бичен оьсдюрювге тергевюн бакъдыргъан. Бугюн районну 14 минг 900 гектаргъа ювукъ топу-ракъларында люцерна оьсе. Ингдеси, йылдан-йылгъа шо санавлар кёпге ба­гъып алышына бара. Янгыз бу йыл районда 5 минг 448 гектаргъа люцерна чачылгъан.

− Язбаш явунлу болгъангъа гёре, биченни тюшюмю де яман тюгюл, – дей районну юрт хозяйство управлениесини ёлбашчысы Марат Алтавов. – Айрокъда Адил Янгыюрт, Тамазатёбе, Хама­матюрт ва 1 номерли Львовск юртларда аслам бичен гьазирленип тура. Шо юртланы сабанчылары ­оьзлени къатты емлери булан Дагъыстанны савлай тав районларын таъмин эте десе де ярай.

Бичен оьзюню сан янын тас этмесин учун, тайлагъа къысыла. Шо саялы да районну авлакъларында гечелер иш къайнай. Техника булан да четимликлер чыкъмай. Техниканы есилери оьзлени машинлерин чалывгъа алданокъдан гьазирлегенлер. Районну авлакъларында гечеси-гюню булан чалыв комбайнлар ва тай къысагъан тракторлар ишлей. Хоншу районлардан гелип ишлейгенлер де аз тюгюл. Биченни къысывда заманны къолдан чыгъарма тюшмей. Чалынгъан биченни тез заманны ичинде къысмаса, ону багьасы тюшме болагъанны сабанчылар яхшы англайлар.

Амма сабанчылар учун бары да зат ­уьстюнлю бара десе де тюз болмажакъ. Чинкдеси, шолар харж булан байлавлу. Айтагъаным, ягъарлыкъ-майлав материалланы багьалары булан бирге машинлешдирив ишлени багьасы да артгъан.

Бугюн сабанчылар бир тайны къысагъангъа – 18 манат, бир гектарны чалгъангъа буса 1 минг 500 манат бермеге борчлулар. Къысылгъан биченингни абзаргъа гелтирмек учун гьар тайны багьасына дагъы да 30 манат къошула. Айтагъаным, бир тай биченни багьасы олагъа 50-60 манатгъа олтура. Шо саялы да сабанчыланы кёплери биченни еринде чыкъгъан багьасындан берип тайдыралар. Бир тай биченге еринде 100 манат береген алывчулар да хыйлы бар. Айтагъаным, яйны геливю булан юртлу сабанчылар оьзлени къы­йыныны ха­йырлы натижаларын гёрюп туралар.

– Бугюн районну сабанчылары топлап турагъан биченни оьлчевю гетген йыллардан да артыкъ, – дей районну юрт хозяйство управлениесини ёлбашчысы Марат Алтавов. – Шогъар, озокъда, явунлу гелген язбаш себепли. Кёбюсю сабанчылар бичен­л­иклерине сув салмагъа тавакаллыкъ этмей. Неге тюгюл де, сув ятса, гюнню къызыву биченни гюйдюрмеге имканлы. Шо бирге саялы да, сабанчылар учун гьава шартлар асувлу ерни тута.

Марат Алтавов билдирген кюйде, бугюнге районда 93 минг 648 тон бичен ва 9 минг 676 тон салам аракълагъа салынып битген. Шо буса ерли гьайванчыланы талапларын да кюте, къыргъа сатмагъа да чола бере. Чинкдеси, гюзге санавлар дагъы да алышынажакъ, неге тюгюл де люцернаны 2-нчи ва 3-нчю чалывлары да бар.