Оьтген итнигюн, июль айны 24-нде, «Дагестан» деген маълумат агентлигинде гезикли прес-конференция болду. Ону барышында бу йыл мердешли кюйде алтынчы керен гюнгюлюлер къуршалып юрюлеген миллиара разилешивню проекти гьисапланагъан «Дослукъну маякълары» деген гьаракатны оьтгеривню шартлары гьакъда баянлыкъ беерилди.
Маълумат къуралларыны мухбирлерине шо гюн «Дослукъну маякълары» деген миллиара разилешивню регионара жамият бирлешивюню бизин республикада иш гёреген бёлюгюню ёлбашчысы Хасбат Тилакъаева, эсгерилген бирлешивюню билим беривге къарайгъан директору Загьида Садыкъова жаваплар къайтарды. ДР-ни милли политикагъа ва дин масъалаларына къарайгъан министерлигини бёлюгюню ёлбашчысы Оксана Ибрагьимова да оьтгерилеген гьаракатны алдына салынгъан борчланы малим этди.
Прес-конференцияны вакътисинде белгили болгъаны йимик, «Дослукъну маякълары» деген проект 2016-нчы йылдан тутуп яшавгъа чыгъарыла. «Дослукъну маякълары» деген миллиара разилешивню регионара жамият бирлешивю, олай да Россияны милли масъалалагъа къарайгъан агентлиги шо проектни сиптечилери болуп токътай. Гьар тюрлю миллетлени арасында дослукъ гьислени тувдургъандан къайры да, асруланы боюнда мердешленип гелеген маданияты, адатлары булан таныш болув проектни оьтгеривню аслу борчларындан гьисаплана.
Загьида Садыкъова билдирген кюйде, бу йыл шо проектни оьлчевюндеги гьаракатлар август айны 3-ю болгъунча давам этилежек. Саратов, Кемерово шагьарлардан, Темиркъазыкъ Кавказны республикала-рындан гелген, олай да дагъыстанлы яшёрюмлер ва жагьил адамлар ортакъчылыкъ этежек. Оланы арасында гетген йылда йимик бу гезик де Луганск, Донецск халкъ республикалардан гелгенлер де болажакъ. Бу йыл олагъа Херсонск ва Запорожск областланы вакиллери де къошулажагъын айрыча эсгермеге тюше.
Прес-конференцияны ортакъчыларыны сёзлерине гёре, эсгерилген проектге байлавлу гьаракатланы шатлыкъ шартларда ачылыву темиркъазыкъ Осетияда оьтгерилежек. Шондан сонг шо проектге къуршалгъанлар Темиркъазыкъ Кавказны республикаларына гетежек.
Оксана Ибрагьимова билдирген кюйде, шо проектде 18 йыл тамам-лангъан сонг жагьил адамлар ортакъчылыкъ этмеге бола.
