Дюнья шарыны майданыны 71 процентин сувлар бийлеген. Ер юзюндеги топуракъланы алтыдан бир пайы буса Россияны топуракъ байлыкълары санала. Умуми кюйде алгъанда, бизин уьлкебизни дазуларыны узунлугъу 61 минг чакъырымгъа етише, шону 22, 125 минг чакъырымы − сув дазулар. Топуракъны йимик, сув байлыкъларыбызны да пачалыкъны ва халкъны талапларын гьисапгъа алып, оланы пайдасы учун къоруп сакъламагъа ва къолламагъа тюшегени англашыла.
Янгы Россияда Дав-денгиз флотну гюню пачалыгъыбызны башчысыны Указына гёре 2017 йылдан тутуп июль айны ахырынчы къаттыгюнюнде оьтгериле.
Россияда Дав-денгиз флотну тарихине о замангъы орус пача 1-нчи Пётрну сиптечилиги булан Гангут къолтукъда россиялы дав денгизчилер швед флотдан уьстюн гелегенини гьюрметине багъышланып кюрчю салынгъан. Шо заман Дав-денгиз флотну генерал-адмиралы Ф. М. Апраксин болгъан. Буса да, къагьрулу денгиз уруш 1-нчи Пётр пачаны башчылыгъы булан юрюлгени гьакъда да белгили.
Артдагъы йылларда адатлангъаны йимик, Россияны Дав-денгиз флотуну гюнюню гьюрметине багъышланып баш парад Санкт-Петербург шагьарда оьтгериле. Бизин республикабызда да Каспийск шагьарда Каспийск флотилияны ортакъчылыгъы булан парад оьтгерилегени мердешге айлангъан.
Дав-денгиз флотда къуллукъ этегенлер макътавлу мердешлени унутмай алдына салынгъан жаваплы ва сыйлы борчларына намуслу кюйде янаша демеге ярай.
Россияны Юваш, Темркъазыкъ, Къара денгиз, Балтыкъ ва шолай да Каспийск флотилиясыны асгерчи къуллукъчулары бугюнлерде оьз пачалыгъыны дазу бойларындагъы парахатлыкъны къоруп сакълав булан тамамланып къалмайлы, Дюнья океангъа чыгъып да, халкъара оьлчевдеги кёмеклешив борчланы, рагьмулу гьаракатланы оьтгеривге де оьз къошумун болдура.
Бугюнлерде Дав-денгиз флотну лап да лайыкълы вакиллери Украинада оьтгерилеген хас дав гьаракатда да ортакъчылыкъ эте. Ватанына берген антына амин болуп, олар борчларына жаваплы кюйде янаша. Шону учун морякланы 138-вюне Россияны Игити деген оьр ат берилген.
Бизге де, Дав-денгиз флотну сыдраларында къуллукъ эте туруп, борчларына намуслу кюйде янашагъан сув дазуларыбызны гёзетчилерине, дав гьаракатланы игитлерине Уьстюнлюк ёрамакъ къала. Антына аминликде жан бергенлени де эсделиги ярыкъ болсун!
