Буйнакск шагьаргъа ва районгъа буз явуп болгъан балагьны гьакъында биз газетни алдагъы номеринде бердик. Артындагъы гюнлерде хатабалагь болгъан ерлеге башында Дагъыстанны Гьукуматыны Председатели А.Абдулмуслимов да булан бирге, шо ишлеге къарайгъан жаваплы къуллукъдагъылар бардылар. Къурулгъан хас комиссия болгъан заралны даражасын белгилемек учун, адамлардан арзалар къабул этив бугюнлерде де давам этиле.

 

Шо масъалалагъа 26-нчы июнда оьтгерилген Дагъыстанны хас штабыны гезикли жыйынында да къаралды. А.Абдулмуслимов сёйлевлени жамын чыгъара туруп, этилген ва этилме герек чараланы гьакъында айтды:

− шо бойда къувунлу гьал билдирилген;

− Дагъыстанны Башчысы Сергей Меликовну тапшурувун кюте туруп, зарал болгъанланы гьисабы токъташдырылып тура;

− адамлардан арзалар береген пунктлар ачылгъан;

− болгъан заралны токъташдырмакъ ва тергемек учун 25 бёлюк къурулгъан. Шолар оьзлер баргъандан къайры да, оьзге учагъан алатланы йиберип де тергевлени толу этелер.

Украина бойдагъы дав агьвалатларда ортакъчылыкъ этегенлени агьлюлерине заралны тайдырмакъ учун акъча булан кёмек этилген. Республиканы резервинден кёп зарал болгъанлагъа 4500 шифер ва акъча кёмек этмек тапшурулгъан.

Дагъыстандагъы МЧС-ни ёлбашчысы Нариман Къазимагьамматов айтгъан кюйде, Буйнакск шагьаргъа бек зарал болгъан.

–26-нчы июнгъа ерли шагьарда яшайгъанлардан 4427 арза къабул этилинген, шолар 3035 уьйде яшайгъан 11620 адамны атындан гелген. Закон янындан алгъанда, 2336 уьйню документи бар. Арза алыв июн айны ахыры болгъанча юрюлежек,– дей министр.–Шолай да, 33 кёп къабатлы уьйге, 12 билим берив ва респуб­ликаны гьисабындагъы 5 къурулушгъа 5 миллион манатдан да артыкъ зарал болгъан.

Районну Халимбекавул­ ва Капиркъумукъ юрт­ларында яшайгъанлардан 377 арза алынгъан, шоларда 1696 адам яшай. А.Абдулмуслимов айтгъан кюйде, тергевлер заралны токъташдырып битгенде, тийишлилеге толу кюйде кёмек этилежек.