Бу йыл Дагъыстанны Башчысы Сергей Меликов ДР-ни Халкъ Жыйынына йиберген Чакъырыв кагъызында республикабызны тарыкълы билимли ва бажарывлу касбучуланы гьазирлемеге тюшегенни эсгерген эди.
Шолай агьамиятлы масъалагъа байлавлу болуп гьали-гьалилерде ДР-ни юрт хозяйство ва сурсат министри Мухтарбий Ажеков министерликни бёлюклерини башчылары булан бирче Буйнакскиде аграр коллежни директору ва коллективи Рашит Аташев булан ёлугъуву болду.
Мухтарбий Къошманбетович жыйында ортакъчылыкъ этегенлеге 2023-нчю йылны март айыны 21-нде ДР-ни Гьукуматыны къарары булан Буйнакск ва Дагестанские Огни деген шагьарлардагъы аграр коллежлер Дагъыстанны юрт хозяйство ва сурсат министерлигини табилигине берилгени гьакъда айрыча билдирив этди.
– Белгили болгъан кюйде, алда эки де аграр коллежлер Россияны илму ва билим берив министерлигини къанатыны тюбюнде иш гёре эди, – деп узатгъан оьзюню сёзюн Мухтарбий Къошманбетович. – Бу йылдан тутуп, бизге бир муратгъа байланып чалышмагъа тюшежек. Юрт хозяйствону тармакъларында ишлейген орта хас билими булангъы яш касбучуланы кёплери юртлагъа къайтма муштарлы болмай. Охуп битген сонг ерлеге бакъдырылгъан тюнегюнгю охувчулар танглагъан касбусуна арт берегени теренден ойлашмагъа борчлу эте. Шону алдын алмакъ муратда гележекде яш юрт хозяйство касбучуланы гьазирлемек учун материал ва ругь якъдан иштагьландырывну чараларын гёрмесек бажарылмай.
Ёлугъувну ахырында гьакълашывлагъа асасланып, коллежни ва шолай да министерликни аслу бёлюклерини башчыларыны пикруларына гёре берилген таклифлер къабул этилинди. Сёзден ишге гёчмек учун шоланы пайдаландырывгъа бермеге герек деп хас къарар да къабул этилинди.
