Ол Украина бойдагъы хас асгер чараларда ортакъчылыкъ эте туруп, уьч керен яралангъан. Артдагъы гезик бу йылны март айында. Гьали огъар аз замангъа буса да уьюне гелип, ювукъ адамларын гёрмеге имканлыкъ бергенлер.

Ол къайтып давлагъа-явлагъа тюшгенче, магъа ону булан бир гиччирек лакъыр этмеге бажарылды. Ону герти атын айтмайман, ихтиярым ёкъ. Олар оьз арасында къоллайгъан атлагъа гёре ол – «Батыр». Дагъы да ол Буйнакск райондан экенин   эсгермеге боламан.  

«Батырны» бай асгер сынаву бар. Украина бойдагъы агьвалатлар башлангъанда ата- анасын, олжасын ва дёрт яшын къоюп, гёнгюллю кюйде Ватаныны алдындагъы борчун кютмеге гетген. ­Огъар «Батыр» деп негьакъ ат къоймагъандыр. Ягъаланы басып яв гелгенде шолай уланлар игитликге айтыла гелген.

– «Я, сагъа да шо къалмагъалгъа къошулма не бар эди», –деп ювукъ адамларыны бирлери айта бола. «Ватаныма ят гючлер басгъын этгенде,   мен ягъада токътап турагъанлардан тюгюлмен», – деп жавап беремен. Атам мени «гьайт» дегенде, «вайт» деп урушлагъа чыкъмагъа уьйретген», – дей «Батыр».

–Асгер борчларыгъызны кютювде не йимик четимликлер булан рас боласыз, – деген соравума асгерче къысгъача жавап бере.

– Инг алдын, гьар солдат оьзюню командирин эшитип, англап бажарма герек. Шо болмай туруп, бир ­уьстюнлюк де амалгъа ­гелмей. Шо якъдан мен башчылыкъ этеген батальонну уьлгюлю асгер бёлюкге санама ярай. Озокъда, кемчиликлер бар, тек шоланы эсгере турмайым, сизде терс пикрулар тувгъанны сюймеймен

– Къоччакълыкъны ордени булан не учун савгъатландыгъыз?

– Авдеевкадагъы ябушувлар учун.

«Батыр» янгыз асгер къурдашларыны гьакъында лакъыр чыкъгъанда жанланып гетди ва узакъ сёйлеп бола­гъанын гёрсетди.

–Биз онда ким къайсы Аллагьгъа сужда къыла деп къарамайбыз, биз барыбыз да – агъа-инилербиз.Мени «Алатолпан» деген бёлюгюмде бек тавакаллы, тергелген уланлар къуллукъ эте – «Бёрю», «Къазакъ», «Эдилсув»… Оланы гьарисини гьар тюрлю тармакъларда оьр билимлери бар. Озокъда, бизин арабызда да тас этивлер ёкъ тюгюл, амма биз къайпанмайбыз ва бир де ругьдан тюшмейбиз, кимге къаршы ябушагъаныбызны бек яхшы билебиз, – деп хабарлай къоччакъ офицер.

– Гьали биз гележекде не затны къаравуллама герекбиз дагъы?

– Уьстюнлюкню! Бизин ата-бабаларыбыз да лап уллу давланы ута гелген, биз – оланы варислерибиз, демек, шо мердешни узатма борчлубуз. Дагъы тюрлю бизин ёлубуз ёкъ.