24-нчю майда Россияны Президентини Темиркъазыкъ-Кавказ федерал округдагъы толу ихтиярлы вакили Юрий Чайка Дагъыстанны Башчысы Сергей Меликов булан бирге Къызлар шагьарда региондагъы оборона-промышленностну ишине багъышлангъан генгеш оьтгерген.
Шо чара «Ростехни» гьисабындагъы Къызлар электро-механика заводну (КЭМЗ) кюрчюсюнде юрюлген. Жыйын башлангъанча, къонакълар заводну выставкалар оьтгерилеген залында болгъан, авиация учун чыгъарылагъан маллар, шонда къурулагъан гиччи самолётлар ва вертолётлар булан таныш болгъанлар.
Юрий Чайка айланада билдирилген санкциялагъа къарамай, завод оланы орнуна оборона учун маллар чыгъарагъанны айрыча разилик булан эсгерген. Заводдагъы кёп станоклар эсгиленген, шоланы янгыларына алышдырмакъ учун кёмек этилежекни билдирген.
Шону булан бирге янгы талаплагъа гёре ишлемек учун касбучулар герек. Бугюнлерде янгыз Къызлар шагьардагъы заводгъа 300 адам тарыкъ. Шоланы гьазирлемек учун башлап алапаланы артдырывгъа чаралар гёрюлме, оьр ва хас охув ожакълар булан тыгъыслыкъда иш юрютме гереги ачыкъ бола.
Сергей Меликов Дагъыстандагъы оборона маллар чыгъарагъан заводланы ишин яхшылашдырмакъ ва масъалаланы чечмек учун федерал оьлчевде шайлы кёмек этилингенни, шо буса гезигинде ишни яхшылашдырма имканлыкъ бергенни айтгъан. 2023-нчю йылда шо натижалар дагъы да яхшы болажакъ, неге тюгюл заводлар этеген дыгъарланы санаву артгъан.
«КЭМЗ» заводну генеральный директору Ибрагьим Агьматов оьсювню ёллары гьакъда, Темиркъазыкъ федерал университетни Дмитрий Беспалов ва Дагъыстандагъы пачалыкъ техника университетни ректору Назим Баламирзоев касбучулар гьазирлевде, шолай да билимлерин камиллешдиривде этме болагъан кёмекни айтгъан.
Арагъа салынгъа масъалалагъа гёре, тийишли къарарлар да къабул этилди.
