Дагъыстанны бавчулукъ тармагъы йылдан-йылгъа генглеше ва 28800 гектаргъа етишген. Шо буса Россияда 2-нчи ерде бола. Къумлу емишлерден буса биз лап алдабыз.
– Биринчилей кюрегени эсгерме тюше, – дей Дагъыстандагъы бавчуланы союзуну директору Сайдулла Орусханов. –Шону учун да артдагъы йылларда шо емишни бала тереклерин гьазирлевге де тергев арта. Дагъыстанда топуракълар аз экенге, шону интенсив къайдада оьсдюрме ва шолай бав этме имканлыкълар болажакъ.
Артдагъы 12 йылны ичинде республикада 17 минг гектаргъа бав салынгъан. Шолардан интенсив къайдадагъы бавлар 4 минг гектар ерде ерлешген: Сулейман-Стальск районда – 2650, Магьарамгент районда – 2160 ва Хасавюрт районда 1309 гектар бар.
Шо къайдадагъы бавланы майданын генглешдирме имканлыкълар да бар, неге тюгюл Дагъыстанда 10 тюрлю майданда питомниклер ерлешген. Инг де гёрмеклиси – Хасавюрт ва Буйнакск бойларда.
Юрт хозяйство министерликден билдиреген кюйде, Дагъыстанны чагъына къыйышагъан кюреге, баъли ва кокан бавлар кёп салынажакъ. Шону булан бирге тав бойларда бавлар болдурувгъа да тергев артажакъ. Шолай бойларда къумлу емишлер арив оьсе.
Сайдулла Орусханов билдиреген кюйде, шо ишлени юрютмек учун Россияны юрт хозяйство министерлигинден де якълав болажакъ. Гетген йыл Дагъыстанда 210 минг тон емиш болдурулгъан. Гёрюлеген чараланы ва юрюлюп турагъан ишлени гёз алгъа гелтирсе, шо санав бу йыл шайлы артыкъ болажакъгъа шеклик этмейбиз.
