Оьтген жумада Янгы Къаягентде Къаягент район администрациясыны халкъны яшавлукъ гьалларына къарайгъан центрыны сиптечилиги ва «Инсан» деген инсаплы фондну кёмеги булан «Ананы юреги – къурумас булакъ» деген тиштайпаланы мажлиси оьтгерилди. Шо мажлис бугюнлерде Донбас бойда ва бизге янгы къошулгъан республикаларда юрюлеген хас асгер гьаракатда ортакъчылыкъ этегенлени агьлюлерине багъышлангъан эди.
Жыйылгъанланы алдында сёйлей туруп, Къаягент районну Имамларыны советини председатели Идрис Асадуллаев булай жыйылмакъ, биригип этилеген дуалар имангъа инанывну артдыра ва тез къабул болагъанны айтды. Район администрацияны башчысыны орунбасары Луиза Жабрайылова мажлисни ортакъчыларына баракалла билдирди ва яшлары дав агьвалатларда ортакъчылыкъ этеген аналагъа, эрлерин гёзлейген къатынлагъа ва аталарын сагъынгъан яшлагъа сабурлукъ ёрады. Олар тезликде уьстюнлюк алып къайтажакъны да айтды.
Къаягент район центрыны ёлбашчысыны борчларын кютеген Жалил Алациев авлетлери давгъа гетген аналагъа уллу алгъышлар этди, бизин яшлар топ тавушланы эшитмесин деп миллетчилени гюн сайын артгъа ташлайгъан игит уланларын тарбиялагъан аналагъа баракалла билдирди.
«Инсан» деген инсаплы фондну Къаягент бойдагъы ёлбашчысы Магьаммат Гьасаналиев пайхаммарларыбыз динге инанывгъа, чыдамлыкъгъа ва яхшылыкъгъа байлавлу мисаллар гелтирип сёйледи.
Шо гюн мажлисге чакъырылгъан адамлары хас асгер гьаракатда ортакъчылыкъ этегенлеге демли тепсилер онгарылгъан эди, мажлис эсде къалар йимик барысына да савгъатлар да берилди. Мажлисге Дагъыстанны муфтиятыны тиштайпалар булан иш гёреген «Гьидаят» деген центрны ёлбашчысы Загьра Исмайылова да чакъырылгъан эди. Ол да оьзю алып гелген ёлдашлары булан ёлугъувну ортакъчыларына насигьатлар берди, Къурандан аятлар, дуалар охуду. Анисат деген къызъяш буса юрекге тиеген ва рагьатлыкъ салагъан нашидлени йырлады. Мажлисге гелген Оьтемиш ва Герга юртланы вакиллери де зикир этип, оьлгенлени жанындан, савланы башындан деп дуалар охуду.
Мажлисни агьамияты гьакъда айтса, яшлары дав агьвалатларда ортакъчылыкъ этегенлеге бу инсаплы иш юреклерине уллу сабурлукъ салды ва маслагьат этди. Къайсы динде де, юрегинде къоркъунчлукъ къонгъан къувунлу гьалдагъы адамлагъа маслагьат этмек, оланы гёнгюн алмакъ яхшы деп айтыла.
Мажлисни оьтгермек учун кёп санавдагъы далапчылар кёмек этген, тек бириси де атын айтгъанны сюймей, Аллагь учун этилеген ишде гёземелик тарыкъ тюгюл.
Садагъаларыгъызны Аллагь къабул этсин!
