Гьали-гьалилерде Тюркияны ва Сирияны дазуларында болгъан ер тербенивню натижасында эки де пачалыкъда 50 мингге ювукъ адам оьлдю, 100 мингден де артыкъ яраланды. Табии балагь къопгъанлагъа къайгъырмагъан ва кёмек къолун узатмагъан адам ёкъдур деме болабыз.


Россияны язывчуларыны союзуну члени Багьавутдин ГЬАЖАМАТОВНУ шиърусунда шо инсаплы иш гьакъда айтыла.

* * *
Сени булан, Тюркия,
Къайгъыра бютюн дюнья.
Хапарсыз гелген балагь,
Языкъсын Рабби Аллагь.

Чёгюлген, авгъан уьйлер,
Дюньядан гетген минглер.
Юреклер авруй, гьалек,
Аллагьдан болсун кёмек.

Уллулар, яшлар йылай,
Юреклер гююп яллай.
Санында къаны къайнай,
Аллагьым бизин сынай.

Алгъасай дёрт де якъ да,
Кёмеклешмеге ят да,
Узатмагъа къолларын…
Ярыкъ болсун ёллары.

Къумукъну имамлары,
Биригип олар бары,
Чакъыра муъминлени,
Эренлерин Элимни.

Авур намусну югю,
Солтан-Мут бизге уьлгю.
Къардашлар да, агъа да,
Къумукъ болмас ягъада.

Къумукъланы кёмеги
Рагьат этсин юрегин,
Къабул болсун, я Аллагь,
Лаиллагьа иллаллагь!

Аллагь, бизин Есибиз,
Терс этмегин эсибиз.
Сабурлукъ инсанлагъа,
Бизин тюрк къардашлагъа.

Инанаман, билемен,
Гележекде гёремен,
Тюркия жанланажакъ,
Тюрленежек, яшнажакъ.

Алатолпан болса да,
Къыйынлыкълар толса да,
Тюрклер сёзюн айтажакъ,
Ал яшавгъа къайтажакъ.

Багьавутдин ГЬАЖАМАТОВ.