Шо ягъындан алгъанда, Кахулай юртда ябушувну кикбоксинг журасы булан машгъул болагъан яшлагъа ва яшёрюмлеге тийишли онгайлыкълар болдурулгъан. Шону яхшылыгъындан ябушувну эсгерилген журасындан янгыз республикада тюгюл, ондан тышда да уьлкени ва дюньяны оьлчевюнде оьтгерилеген ярышларда кахулайлы яшёрюмлер шайлы оьрлюклеге етишген. Оьтген заманны ичинде етишген уьстюнлюклени гьакъында айта туруп, Кахулайны юртбашчысы, чемпионланы отаву деп айтмагъа ярайгъан «Лидер» деген ерли спорт клубну ёлбашчысы ва ябушувну кикбоксинг журасындан тренери Шамил Къадиев мени булан булай лакъыр этди:
– Камил Мурзаевни гьаракаты булан 1993-нчю йылны башында «Ташгъын» деген бирлешив къурулгъан эди. Ол шо йылларда ябушувну оьзю ойлашып яратгъан «гёз алда» деген къайдасын бары да къумукъ юртларда яймакъ булан бирге, бизин, тренерлени, сынавун камиллешдирмеге де айрыча къастлыгъын болдурду. Спорт булан машгъул болагъан яшлар булангъы ишимни мен оьзюм де шо йылда башлагъанман. Оьтген шо йылланы ичинде мени алдымда 10-дан да артыкъ спортну устасы тарбиялангъан. Шоланы арасында янгыз кахулайлылар тюгюл, таргъулулар да, албёрюгентлилер де бар.
Юрт школада биз яшлар спорт булан машгъул болсун учун айрыча зал гьазирлегенбиз. Бугюнлерде шонда ара бёлмей юрюйгенлени санаву 60-гъа етише. Озокъда, яшлар спорт булан машгъул болуп къалгъан булан битип къалмай, оланы тарбияламагъа герек. Айтагъаным, ябушувну оьзю танглагъан журасында уьстюнлюклер къазангъан кочапгъа тарбиясыз болмагъа ярамай. Яшёрюмлер булан юрюлмеге тюшеген ишни шо ягъына да бизде артыкъ агьамият бериле. Шондан къайры да, спортну гьар къайсы журасы да яш адамны къаркъарасын чыныкъдыра, къуватлы эте, чыдамлыкъгъа уьйрете.
Ери гелгенде айтып къояйым, яшланы тарбиялавгъа байлавлу юрютеген гьаракатыбыз да негьакъ гетмеген. Ич ишлер къурумларындан маълуматлар исбатлайгъанда йимик, спортклуб иш башлагъанлы, бизин алдыбыздан чыкъгъанлар гьеч ким бир жинаятчы иш этген деп гьисапгъа алынмагъан.
Ябушувну кикбоксинг журасы булан машгъул болагъан кочаплар Олимпия оюнларда ортакъчылыкъ этмейгенге гёре, спортгъа къарайгъан министерликни янындан гьайлы янашыв гьис этилмейгенге де къарамайлы, Шамил Къадиев ва ону булан бирге чалышагъан Хайрутдин Будаев яшлар булан гьар гюн тренировкалар оьтгере. Оланы муштарлыгъын артдыра, ябушув усталыгъын ва бажарывлугъун камиллешдире. Шо саялы болмагъа ярай, сынавлу тренерлени гьаракатыны гьасиллери, тренировкаларда тёкген къыйыны зая гетмейли, гьар даим де арагъа чыгъа. Шо гьакъда айта туруп:
–Янгыз артдагъы йылланы натижалары гьакъында айтсам,– деп узата ол дагъы да, – 2011 -нчи йылда Италияда оьтгерилген Европаны чемпионатында ортакъчылыкъ этип, Мама Мамаев биринчи ерге, Ислам Алимурзаев ва Камил Магьамматов буса уьчюнчю ерлеге ес болдулар. Артындагъы 2012-нчи йылда олар Россияны чемпионлары болду, Шамил Солтанбеков буса дюньяны чемпионатында алтын медаль къазанды. Оьрде атлары эсгерилген кочаплардан къайры да, Исламгерей Къадиев, Рабадан Рабаданов 2013-нчю йылда Анапада Дюньяны кубогун алмакъ учун юрюлген ярышларда айрыча оьрлюклеге етишмеге бажардылар.
Бу йыл сентябр айны ахырынчы гюнлеринде Анапада оьтгерилген ярышларда яшёрюмлени арасында 63, 5 кило авурлукъда Аскерхан Мамаев биринчи, 67 кило авурлукъда Мухтар Ягьияев уьчюнчю, олай да 67 кило авурлукъда Набиюлла Акаев уллуланы арасында экинчи ерлеге ес болдулар. Олар оьзлени къасты, къайпанмаслыгъы булан къолда этген уьстюнлюклер макътавгъа лайыкълы.
Кахулайлы яш кочапланы эсгерилген уьстюнлюклерде, озокъда, олагъа имканлыкъларына гёре къол къошагъан юртдан чыкъгъан далаплы ва мадарлы уланланы да айрыча къошуму бар.
Мени булан оьтгерген лакъырлашывну ахырында Ш. Къадиев эсгерген кюйде, буссагьатгъы заманда кахулайлы яш кочаплар октябр айны 30-нда оьтгерилежек Дагъыстанны чемпионатында, олай да декабр айда Грозный шагьарда Россияны кубогун къазанмакъ учун болажакъ ярышларда ортакъчылыкъ этмеге гьазирлик гёрюп тура. Газетибизни кёп санавдагъы охувчуларыны атындан олагъа шо ярышлардан да янгыз алдынлыкъ алып къайтмакъны ёрайбыз.
Н. БАЙБОЛАТОВ.
СУРАТДА (солдан онггъа багъып): Ш. Къадиев оьзю уьйретеген кочаплар Н. Акаев,
А. Мамаев, М. Ягьияев булан.
