Бурлият Ибрагьимованы атындагъы рагьмулукъ фондну инсаплы ишлери кёп болуп бара. Оьтген йыл фонд республиканы райлонларында «Жанлы сёзню тамчылары» деп ат тагъып, гиччипавланы арасында къумукъ тилде шиъру охувну конкурсун оьтгерген эди. Шолай да фонд спортда, охувда, илмуда ва башгъа тюрлю гьаракатларда уллу даражалагъа етишгенлеге баракалла кагъызлар ва савгъатлар тапшура. Шоланы арасына инсаплы иш этегенлени де къоша.
«Дагъыстан» деген издательствону ёлбашчысы Умаросман Гьажиев тюрлю-тюрлю йылларда жаваплы ишлерде чалышгъан ва бажарывлу кюйде юрютген. Ол этеген гьалал къуллукъну гьисапгъа алып, Россияны халкъ артисткасы Бурлият Ибрагьимованы гьакъындагъы китапланы чыгъарывда этген кёмеги учун, эсгерилген фондну директору Сакинат Магьмутова, ортакъчылары Салавдин Мусалаев ва Юсуп Гьажиев Умаросман Гьайбуллаевичге Баракалла кагъыз, «Гьюрметли къумукъ» деген белги ва савгъат тапшурду.
