Бугюн, февраль айны 8-нде, «Дагестанская правда» газетни редакциясында ДР-ни милли политикагъа ва дин масъалалагъа къарайгъан министри Энрик Муслимовну прес-конференциясы болду. Бизин республиканы милли газетлерини мухбирлери булан оьтгерилген шо ёлугъувда ол оьзю ёлбашчылыкъ этеген министрлик оьтген 20222-нчи йылда не къадар гьаракат болдургъаны гьакъда баянлыкъ берди. Шону булан бирге, бу йыл яшавгъа чыгъармагъа гёз алгъа тутулгъан ишлени де малим этди.
Инг алда ол оьзю ёлбашчылыкъ этеген министерлик гьар тюрлю динлени юрютегенлени арасында байлавлукъ болдурувгъа къарайгъандан къайры да, оланы пачалыкъ ва жамият къурумлары булан аралыкъланы беклешдиривге тергев берегенин билдирди. Шондан къайры да, бизин республикада экстремист ва террорчулукъ ваъшилик ишлени алдын алывгъа байлавлу юрюлеген гьаракатны асувлулугъун артдырывгъа да артыкъ тергев берегенин де ташдырды. Бизин республикада тышда яшайгъан миналы дагъыстанлылар булан бирге чалышывну ёлларын да белгилейгени гьакъда айтды.
Ону сёзлерине гёре, бизин республикада гьпр тюрлю миллетлени арасындагъы аралыкълар кёпден берли оьсювню ёлуна тюшген. Оьтген йылны ичинде бизде гьар тюрлю миллетлени арасында татывсузлукъ тувулунагъан кюйде бир керен де къалмагъал болмагъан. Шо гьакъда айта туруп, ол эсгергени йимик, тек бир тайпалар яшавлукъ шартланы айланачында тувулунагъан онгайсызлыкъланы да, топуракъгъа еслик этивге байлавлу масъалаланы да бир-бир гезиклерде эки милллетни вакиллерини арасындагъы къалмагъал гьисапда гёрсетмеге къасткъылагъанлар арагъа чыкъмай да къалмай.
Мухбирлени соравларына жавап бере туруп Энрик Муслимов оьзю ёлбашчылыкъ этеген министерликни сиптечилиги булан бизирн республиканы гьакимлик къурумларыны жаваплы къуллукъчуларыны айрыча гьар юртну жамааты булан къатнавну болдурмакъ муратда шартлар яратмакъ учун да ёллар ахтарыла. Оьтгерилеген гьар тюрлю гьаракатлагъа жагьил адамланы къуршап, оланы патриот ругьда тарбиялавгъа тергев бериле. Ана тиллени къоруп сакълавгъа да, оланы уьйренивге муштарлы этердей чаралар белгилене. Шо муратда министерликни янындан гёрсетилген акъча маялар харжланып, яшлар ва уллулар учун милли тиллерде китаплар чыгъарыла, гьар тюрлю конкурслар, къаравлар оьтгериле. Шо ишлер барысы да гележекде де узатылып туражакъ.
Н. БАЙБОЛАТОВ.
