Баш редакторну баяны

Йыллар бирини артындан бириси геле. 2022-нчи йылны да ёлгъа салдыкъ. Алдындагъы йыллар йимик, бу йылыбыз да рагьатлыкъда оьтмеди. Коронавирус деген къагьрулу аврувдан сонг, дюньягъа террорчулукъ ва миллетчилик деген «аврув» яйылма башлады. Эгер де оьрде эсгерилген аврувну алдын алма болмагъан бусакъ да, миллетчиликни алды алынды ва шогъар къаршы чаралар гёрюлме башлады.

Россияны Президенти В.Путин Донецк, Луганск халкъ республикаланы, Запорожск ва Херсон областланы халкъыны референдумларыны гьасиллерине гёре шоланы Россияны гьисабына гийирди. 8 йылны ичинде шоларда питне салып турагъан миллетчилерден арчылмакъ учун, ерли гьакимликни тилевюне гёре хас асгер гьаракат башланды. Бугюнлеге ерли эсгерилген бойланы кёп ери миллетчилерден азат этилип битген. Азат этилинген ерлерде халкъны яшавун яхшылашдырывгъа чаралар гёрюле.

Оьтген йылгъа да Дагъыстан учун яшавлукъ-экономика оьсювню йылы болду деп айтма ярай. 2022-нчи йылда милли проектлеге гёре кёп санавдагъы школалар ва яшлар бавлары къурулду, савлукъ сакълав идаралар янгыртылды, парклар ва гюлбарлар ачылды, ёллар ярашдырылды, демек, адамланы яшавлукъ гьалы яхшылашсын учун чаралар гёрюлдю.

Оьтген йылда Дагъыстангъа кёп санавдагъы инвестициялар салынажагъы ачыкъ болду. Къаягент бойда «Къаягент» деген курорт-шагьар къурулажагъын Россияны Президенти В.Путин билдирди. Дербент, Хасавюрт ва Къарабудагъгент районларда насланы ишлетеген уллу заводлар къурулажакъ. Къарабудагъгент бойда бир нече йыллардан «Уьйташ» деген ерде 130 гектарда къурулуш материаллар этеген, сонг Магьаммат Гьажиевни атындагъы заводлар, олай да «Агрико» деген центр да къурулажакъ. Дагъы да, Тюркия, Китай, олай да Германия бирлешип, цемент этеген завод ишге салынажакъ. Булар къурулуп респуб­ликагъа налоглар гележекден къайры да, минглер булан иш ерлер де ачылажакъ. Шо проектлеге къоллар салынгъан. Мохок деген ерде, Къоркъмас­къала бойда сув ва ел электростанциялар къурулажакъ, айтагъа­ным, Дагъыстан инвестициялар салынагъан­ пайдалы ер болуп токътажакъ.

Янгы йылда 50-ден артыкъ адамларыбызны юбилейлери болажакъ, биз газетде оланы гьа­къында толу кюйде язажакъбыз. Редакция охувчулар булангъы ёлугъувланы да артдырма хыял эте. Оланы яшав гьаллары гьакъда, не масъалалар къыйнай, нени ва нечик язгъанны сюе – шолар барысы да «Ёлдаш» газетни бетлеринде чыгъажакъ. Биз энниден сонг да халкъыбызны бирлиги болсун, дослугъу ва аралыкълары бек­лешсин учун макъалалар язажакъбыз. Гелигиз, бир-биревден сююнейик, бир-биревню тутайыкъ ва якълайыкъ, яхшылыкъ ёрайыкъ.

Бир-биревню яшама уьйретегенлер кёп болмасын, оьзлер татувлу яшап гёрсетсин, бир-биревню башын сёйлейгенлер артмасын, шолай этгенче, кёмек этсин, гьакълашып, бир-биревню тутуп, якълап, миллети булан оьктем болуп яшама насип болсун. Газетни герти къурдашлары болуп тургъан охувчуларыбызгъа, къумукъ миллетибизге, гиччи ватаныбызны ва уллу уьлкебизни ватандашларына да гелеген йыл насипли йылланы бириси болсун деп айтма сюемен. Арабыздан дослукъ, татывлукъ, бирлик таймасын.

Бирдагъы йыл да гетди. Янгы йылыбызда умутларыбыз яшавгъа чыгъагъан, къайгъыларыбыз тайып, сююнеген йыл болсун!