Бизин уьлкебизде, Дагъыстан йимик четим шартлары булангъы регионда, ёлланы къурув ва пайдаландырывгъа берив – агьамиятлы масъала. Неге десегиз, гьар йыл ёлланы бузукълугъундан ва оьзге тюрлю себеплерден транспортда болагъан хатабалагьланы алдын алмакъ учун онгайлы къуллукъланы болдурмасакъ, тас этивлени алдын алмагъа бажарылмай. Натижада йыл боюнда онлар, юзлер булангъы адамлар сакъатлана, демек, савлугъундан, яшавундан магьрюм къала…
ДР-ни транспорт ва ёл хозяйство министри Жамболат Салавов бизге билдирген кюйде, 2022-нчи йылгъа аманлыкъны ёлларын къуруп пайдаландырывгъа бермек учун 11 миллиард манатны харжламагъа умут этиле. Шону 1,2 миллиарды федерал бюджетден айырылгъан акъча маялар экени гьакъда да айрыча эсгерме тюше.
– Регион ва федерал бюджетлерден агьамиятлы проектлени яшавгъа чыгъармакъ учун ёлланы ярашдырмагъа ва янгыртмагъа ломай харжлар гёрсетилинген, – деди Жамболат Салавов. – Дагъы да аянлашдырып айтгъанда, бу йыл янгы ёлланы 53 чакъырымда къуруп пайдаландырмагъа гёз алгъа тутулгъан. Шону булан янаша 308 чакъырымдагъы ёлланы ярашдырмагъа ва 7, 589 чакъырымда гьар тюрлю онгайлы къуллукъланы яратмагъа умут этиле. Регион ва федерал оьлчевдеги ёллар булан иш битмей. Белгили болгъан кюйде, бу йыл республикабызны ерли къурулувларындагъы 200 чакъырымдагъы ёлланы да ярашдырмагъа тарыкъ болажакъ.
Артдагъы йылларда бизин республикабызгъа ял алмагъа ва савлугъун беклешдирмеге къонакълай гелеген туристлени санаву белгили кюйде артып тербей. Бу йыл Дагъыстан 2 миллионгъа ювукъ туристлени къаравуллайгъаны саялы, ёлланы янгыртывдан ва ярашдырывдан баш къачырмагъа тюшмейгени гьакъ.
Айтмагъа сюегенибиз, туристлени сапары тахшагьарыбыздан башлангъанын гьисапгъа алып, 2022-нчи йылда «Аманлыкъны асил ёллары» деген милли проектни оьлчевюнде Магьачкъалада 21 чакъырымдагъы орамланы ярашдырма ва шолай да 50 чакъырымда регион ёлланы янгыртмакъ муратда юрюлеген гьаракат гюн сайын гюч ала.
Эсгерилген пачалыкъ программа булан янаша бизин республикабызда «Мени Дагъыстаным – мени ёлларым» деген регион программаны оьлчевюнде юрюлеген къурулуш ишлер де ёлланы бузукълукъларын ёрукълашдырывдан башлана.
Къ. КЪАРАЕВ
Автор чыгъаргъан суратлар.
Суратда: Тахшагьарыбызны Семендер посёлогундан оьтеген Солтансайит Къазбековну атындагъы орамны гёрюнюшю.
Автор чыгъаргъан суратлар.
