Россияны гюню – уьлкебизни аслу байрамларыны бириси. Шо байрамны алдында Хасавюрт район китапханада байрамгъа багъышлангъан «Юрегибизде – Россия» деген «дёгерек стол» оьтгерилди.

Бары да китапханаланы заведующийлери ортакъчылыкъ этген чараны ача туруп, районну китапханаларыны бирлешивюню ёлбашчысы Зулфия Абасова Россияны гюню – Парахатлыкъны, азатлыкъны ва бютюн халкъны разилик байрамы экенни айтды.

-Бизин уьлкеде кёп миллетлер яшай, гьарисини оьз маданияты, оьз адабияты, адатлары ва къылыкълары бар, – деди З. Абасова. –Шоланы барысыны да бирлигине Россия деп айта. Россия – бизин тувгъан элибиз, яшавубуз ва ожагъыбыз. Биз барыбыз да шону аманлыгъын болдурмакъ учун къаст этме герекбиз.

Ондан сонг сёйлеген методика бёлюкню заведующийи А. Пашаева шо гюнге багъышлангъан чаралар оьтгерилегенни айтды. Шолай, Эндирей, Первомайское, Хамавюрт, Нурадилово, Теречное, Ботаюрт, Боташюрт ва Гьажимажагьатюрт юртларда «Мени гимним, мени байрагъым, мени Россиям» деген китап выс­тавкалар, Къуруш, Муцалавул, Покровское, Генжеавул, Темиравул, Советс­кое, Сулевгент, Теречное ва Тукита юртланы китапханаларында «Мен – Россияны ватандашыман» деген яшёрюмлени тарбиясына бакъгъан чаралар да оьтгерилип тура.

Къ. КЪОНАКЪБИЕВ.