Бажаргъан озар, бажармагъан чарыгъын тозар деген кюйде, гьар-бир ишде оьз касбусун юрютювде алгъасавлукъгъа ёл бермейли, борчларына усталыкъ булан янашмагъа таклиф этилине. Тек не этерсен, шогъар да къарамайлы, иш уьстюнде бир-бир гезиклерде айсениликге ёл берилегени саялы, къыставуллукъда къоркъунчлу гьаллар тувулуна. Шолайлыкъда, адамланы жаны къыйыла, малы-мюлкю уллу тас этивлеге тарыйгъаны белгили…
Алдагъы девюрде йимик, гьалиги заманда да ДР-ни загьмат ва адамланы яшавлукъ шартларын якълав министерлигини янындан иш уьстюнде хантавлукъну натижасында айрыча адамлагъа ва къурумлагъа зарал болмасын учун, аманлыкъны болдурувну масъаласына тийишли тергев бакъдырыла демеге ярай. Айтмагъа сюегеним, арадан оьтген 2021-нчи йылны ичинде шону гьисапгъа алып, пачалыкъ ва шолай да жамият къурумларда, производство предприятиелерде промышленностда йимик, аграр тармакъда да, умуми кюйде алгъанда, 1700 тергев оьтгерилди.
Оьтгерилген тергевлени натижасында иш ерлердеги низамны къорувда, ишлейгенлени тийишли сурсат ва опуракъ гийимлер булан таъмин этивде йиберилген кемчиликлер аян болду. Шолагъа гёре иш берегенлени айыплап хас буварывлар этилинди ва иш низамны къоруп сакъламайгъаны саялы жавапгъа тартылды.
Белгили болгъан кюйде, гьалиги заманда 1 мингден де къолай предприятиеде загьмат низамны болдурмакъ учун адамланы хатабалагьлардан къоруп сакълавгъа байлавлу хас комиссиялар иш гёре. Демек, артдагъы йылларда бизин республикабызны шагьарларында къурулуш ишлер генг кюйде оьтгериле. Алдагъы 5,7,9 къабатлы уьйлени орнуна уллу 20-24 къабатлы уьйлер гьалиги заманда Магьачкъалада да къаршылаша. Айтмагъа сюегеним, къурулуш ишлерде айрыча сакълыкъны болдурувгъа тергевню гючлендирмеге тюше.
Ишчи коллективлерде бу йылны башына ерли бизин республикабызда хатабалагьлагъа ёл берилмесин учун иш гёреген 1384 вакил айырылгъан. Шону учун оьтген йыл гьар тюрлю къурумланы ва предприятиелени янындан загьматда хатабалагьлардан къоруп сакълавгъа къарайгъан вакиллик этилген 16 880 адам хас охутув ожакъларда билимлерин камиллешдирген.
