Оьтген жуманы ахырында савлай дюньяны бусурманлары учун инг де сыйлы уьч айны бириси Ражап ай башланды. Магьаммат Пайхаммар (а.с.) кёбюсю гьадислеринде айтылагъаны йимик, Ражап айда Аллагьгъа ибат этивге, намаз къылывгъа, зикир охувгъа артыкъ агьамият бермеге тюше.
Шону булан бирге, товба этив Ражап айда этилмеге тюшеген лап яхшы ишлерден гьисаплана. Ражап айда урлукъну топуракъгъа ташлай, демек, адам товба эте. Шагьбан айда чачылгъанны сугъара, демек, товба этген сонг яхшы ишлер эте. Рамазан айда буса мол тюшюм жыя, демек, товба да этген, яхшы ишлени де кютген сонг, адам гюнагьларындан чайыла, уллу даражалагъа гётериле.
Яратгъан Есибиз Уллу Аллагь Ражап айда давлар этмеге, эришивлюклер юрютмеге гьарам этген. Шо айны сыйлылыгъына гьюрмет этип, бырынгъы заманларда Каабаны сакълайгъанлар ону эшиклерин ачып сакълай болгъан. Башгъа айларда буса Каабаны эшиклери янгыз итнигюнлер ва жумагюнлер ачыла болгъан. Олар: «Ражап – Яратгъаныбызны айы, Кааба буса – Ону Уью. Адамлар да – Есибизни къуллары. Шо саялы биз оланы Яратгъаныбызны айында Есибизни Уьюнден арекде сакъламагъа болмайбыз», – деп айта болгъан дейлер.
Магьаммат Пайхаммарны (а.с.) гьадислеринде булай айтыла: «Ражап – Яратгъаныбызны айы. Шо айда бир гюн сама ораза тутгъан адам булан Аллагь рази болурну эсигизде сакълагъыз». Ону бирдагъы-бир гьадисинде: «Ражап айда ораза тутугъуз. Неге десе, бу айда тутулгъан оразаны Аллагьгъа товба этивню айрыча къайдасы йимик къабул эте», – деп де айтыла.
Ражап айны гьар гечеси де, жумагюню де къыйматлы. Шо айны биринчи хамисгюнюнде ораза тутмагъа яхшы. Артындагъы гече буса биринчи жумагюн юхламай ибадат этсе яхшы деп гьисаплана. Шо гечеге Лайлат-уль-Рагьаиб деп айтыла. «Рагьаиб» деген сёзню маънасын: «Аллагь гечерге умут. Ону къулларына бакъгъан рагьмулукъ ва тилеклени, ва дуаланы къабул этив» деп англамагъа ярай. Шо гече Магьаммат Пайхаммарны (а.с.) ата-анасы гебин къыйгъанлар. Шогъар Рагьмулукъну гечеси деп де айтыла. Неге тюгюл, шо гече Яратгъаныбыз Оьз къулларына рагьмулу янаша. Шо гече къылынгъан намаз къабул этиле, намаз, тутулгъан ораза, берилген садагъа саялы этилеген шабагьат кёп-кёп керенлер арта.
Мигьраж гече
Ражап айны 27-нчи гечесине чыгъагъан гече Аллагьны Ахырынчы Элчиси бизин Магьаммат Пайхаммар (а.с.) кёкге – Мигьражгъа чыкъгъан.
Мигьраж – Яратгъан Есибиз Уллу Аллагь Магьаммат Пайхаммаргъа (а.с.) этген абур болгъан.
Мигьражда Магьаммат Пайхаммар (а.с.) бир башлап етти кёклеге гётериле, сонг Ол гьеч ким гётерилмеге болмасдай оьрлюклеге чыгъа. Адамны гьакъылы инанып битмесдей, етип болмасдай кёп-кёп муъжизатланы, демек, кёклердеги Каабаны, женнетни, жагьаннемни, Аршны, Курсну ва хыйлы оьзгелерин гёрген.
Гьар кёкде Ол оьзюне салам береген пайхаммарланы гёрген. Шондан сонг Ол пердевсюз Аллагь булан сёйлеген. Бу тамаша гече Яратгъаныбыз бусурманлагъа гьар гюнлюк беш намазны да борч этген.
