Адамны загьмат ёлу гьакъында алдын ерли газетлерде язылып чыгъа ва радиодан таба берилишлерде де айтыла эди. Шолай гьаракатчылыгъын гёрсетгенлени арасында юртлу мухбир чонтавуллу Магьаммат Аскеров да бар.
Магьаммат Исабекович 1929-нчу йыл 24-нчю декабрде сабанчыны агьлюсюнде тувгъан. Магьаммат агъавну загьмат ёлун гёзден гечирип къарагъанда, гьар тюрлю ерлерде ишге къуршалгъаны гёрюнюп тура. Къызылюрт райпода, Орджоникидзени атындагъы ерли совхозну тюрлю-тюрлю тармакъларында ол загьматгъа берилген.
Муна шоланы барысыны да гьакъында Магьаммат Аскеров оьзю язгъан макъалаларында эсгере эди. Языв-бузув булан байлавлу экенине болмагъа ярай, ону макъалалары «Дослукъ» деген адабият журналда, «Ленин ёлу», «Солакъны тангы», сонг буса «Правда», «Ёлдаш», «Къызылюртну янгылыкълары» деген ва оьзге газетлерде пайдаландырылды. Ондан къайры да, шо йылларда штатда тюгюл мухбирлени язгъанлары бары да миллет газетлерде чыгъа эди ва Дагъыстан радиода да шо кюйде гьар тюрлю тиллерде юрюлеген берилишлерде де бериле эди.
Магьаммат Исабековични гьаракатчылыгъы языв-бузув булан байлавлу тармакъда некъакъ болмагъан демеге ярай. Шону гертилейген шулай далиллер де гелтирме сюемен. «Правда» газетни 50 йыллыкъ юбилейи булан къутлай туруп, гьаракатчылыгъын болдургъан саялы, огъар ДАССР-ни Оьр Советини Президиумуну Гьюрметлев грамотасы берилген. Сонг да, «Солакъны тангы» деген газетни редакциясы да огъар гьюрметлев грамота тапшургъан.
Магьаммат Исабекович 2003-нчю йыл 2-нчи январда 74 йыллыкъ чагъында гечинген. Ону ярыкъ келпети, дос-къурдашыны ва къалам къурдашларыны эсинде даимге къалажакъ.
