Къайсы юртгъа барсакъ да, абур-сый къазангъан адамлар ёлугъа. Муна Чонтавулда Алюковланы агьлюсю шолайлардан гьисап этиле. Шарапутдин Устарханович ва Екатерина Никитична оьрлюклеге етишип, ата юртуну атын да гёрмекли этген ва оьсюп гелеген яш наслугъа да уьлгю болуп токътай.
Шарапутдин Устарханович 1924-нчю йыл январ айда тувгъан, ону агьлюсю Екатерина Никитична буса ондан бир йыл гиччи. Бу эр-къатын экиси де – муаллимлер, бир-бирине сююп къошулгъанлар.
Хасавюртдагъы педагогика училищени охуп битдирген сонг, Шарапутдин Уллу Ватан давгъа чакъырыла ва немис-фашистлени дагъытывда ортакъчылыкъ этген. Ол Къызыл Асгерлени сыдрасында Польша, Венгрия йимик пачалыкъларда юрюлген къызгъын давлардан оьтген. Фронтда гёрсетген къоччакълыгъы учун «Кавказны, Варшаваны ва Будапештни азатлыгъы учун» деген медаллагъа ес болгъан. Дагъы да ону тёшюн «Уьстюнлюк учун» деген медаль елеген.
Давдан сонггъу йылларда Шарапутдин Алюков ата юртунда муаллим болуп, «Ленинский путь» деген район газетни редактору болуп ва КПСС-ни Къызылюрт райкомунда ишлеген.
Янгыз загьматгъа берилгенден къайры да, Шарапутдин Алюков поэзиягъа бакъгъан якъдагъы сюювюн шиърулар язып, шону охувчулагъа етишдирме къасткъылгъан. Ону таъсирли кюйде язгъан шиърулары анадаш тилибизде чыгъагъан «Ёлдаш» газетни бетлеринде де бир нече керенлер ерлешдирилген.
Къайда болса да, не ишде ишлесе де, Шарапутдин Устарханович оьзюне тапшурулгъан борчланы ахырына ерли кютюп, мекенли кюйде оьзюн гёрсетме бажаргъан.
