2018-нчи йылны ахырында Москвада Кремлни къаласында «Касбу гьаракатчылыгъы ва далапчылыгъы булан Ватанны беклешдирив» деген премиялар берилди.
Шо премиялар Россияны яшавлукъ-экономика оьсювюне аслам къошум этген гьукумат ва жамият чалышывчулагъа, маданиятны ва инчесаниятны вакиллерине бериле. Анатолий Карпов, Валерий Газаев, Станислав Черкесов булан янаша шолай савгъат Солтан Янгыюртлу Рашит Завурович Яниковгъа да берилди.
Рашит Яников 1987-нчи йылда Солтан Янгыюртда тувгъан. Юрт хозяйство академияны битдирген Рашит, атасындан 200 доллар да алып, оьзюню айрыча ишин юрютме сюе. 2005-нчи йылда ол Китайдан 500 эргишилер учун опуракъ гелтире. Оланы салмакъ учун квартир тута ва ижарагъа тюкен де ала. Бир йылдан Рашитни далапчылыгъы ва гелтиреген маллары арта. Арадан дагъы да 3-4 йыл гетип, Рашит оьзюню эскизлерине гёре опуракъ тикме башлай. Артда ол «Yanikov» деген аты булангъы опуракълар, аякъгийимлер, сумкалар этеген компания къура. Бугюнлерде Рашитни фирмасы Китайда ва Тюркияда сан янлы маллар гьазирлей. Россияда фабрикалар ишлеме башлагъанда ол малланы мунда этме хыялы бар. Бугюнлерде «Yanikov» деген компанияны янгыз Россияда онлар булангъы тюкенлери бар, йыл сайын оланы санаву артып да тура.
2006-нчы йылда Рашит Merle Blanc марканы тюбюнде эргишилеге ва тиштайпалагъа аякъгийимлер чыгъарма башлай. Шоланы этеген фабрикалар Испанияда, Португалияда ва Китайда ерлешген. Демек, шолай аты булангъы гийимлер азия ва европа бойларда бек алына.
Бугюнлерде «Yanikov» деген компания 800 тюрлю аякъгийим ва 200 тюрлю сумкалар, пумажниклер, белбавлар эте. Бугюн шо компанияда белгили модельерлер ва бажарывлу художниклер янгы-янгы опуракълар чыгъара. Рашит Яниковну малы Россияда 1606-нчы ерни ала. Миллион тюрлю опуракъ чыгъарагъанланы арасында шо яман санав тюгюл.
Биз де огъар дагъы да уллу оьрлюклеге етишмекни ёрайбыз!
