Яшавлукъ шартлары себеп болуп, яхшы яшавну ёлларын излей туруп, гьар халкъны, миллетни вакиллери оьзге ерлеге гёчелер. Натижада ана тил унутула, ахырда тас болмагъа башлай. Шолай къоркъунчлукъну дюньяны халкъларыны 90 проценти къаравуллай. Россияны алгъанда, 151 миллетни ана тили ёкъ болмагъа болагъан гьалда. Уьстде айтылгъан къоркъунчлукъланы гьисапгъа алып, ООН-ну Баш Ассамблеясы 2019-нчу йыл ерли аз санавлу миллетлени тиллерини Халкъара йылы деп билдирген.
ООН-ну ёлбашчыларыны планларына гёре дюнья оьлчевлеринде кёп чаралар оьтгериле. Шолар Россияда, Дагъыстанда, шагьарларда, районларда, юртларда да сав йылны узагъында юрюлюп тургъан.
Декабрни 5-нде ана тилибизге багъышлангъан ёлугъув Къаранайавул юртдагъы (Къаягент район) орта школада да оьтгерилди. Мунда жагьил къумукъ шаир Нурьяна Арсланова чакъырылды. Школаны къумукъ тилден дарс береген муаллимлери Дедей Исаева, Мильянат Амаева ёлугъувну сиптечилери болуп чыкъдылар. Оланы яхшы умутларын, ишин яшавгъа чыгъармагъа школаны директору Камал Камалов да кёмек этди.
Артдагъы йыллар Къаранайавул орта школаны ишлери гюн сайын яхшы якъгъа алышына. Айтагъаным, школаны материал базасы мугькамлаша. Бу йылны орталарында аслу бинаны къалкъысы толу кюйде ярашдырылды. Аз-маз ремонт ишлер оьзге биналагъа да этилген. Шондан къайры, охув-тарбиялав ишлер де жанлангъан. Школаны охувчулары район, республика, Россия олимпиадаларда даим ортакъчылыкъ эте. Натижалары да макътардай. Уьстюнлюклени аслам пайы школаны директору Камал Магьамматович Камаловну уллу гьаракаты булан байлавлу деп ташдырып айтмагъа болабыз.
Декабрни 5-нде шаир Нурьяна Арсланова ва ону шиъруларыны сёзлерине йырлар йырлайгъан къурдаш къызы, сырдашы Саният Надирбекова школаны бинасыны алдына гелип токътадылар. Школаны жыйынлар оьтгерилеген залына жыйылгъан яшлар ва уллулар шаирни харс урувлар булан къаршыладылар. Залда биз республиканы ат къазангъан маданият къуллукъчулары – ерли клубну ва ерли юрт китапхананы заведующийлери Зугьра Мужайытованы, Аминат Жамалутдинованы да гёрдюк. Сонг олагъа юртдагъы ясли бавну заведующийи П.Къубатова ва оьзге къуллукъчулары да къошулдулар.
Ёлугъув алданокъ къурулгъан плангъа гёре юрюлдю. Сёйлевлер, сарынлар, бийивлер булан толумлашдырылып турду. Сонг сёз ёлугъувну сиптечилерини бириси, школаны муаллими М.Къубатовагъа берилди. Ол бу ёлугъувну оьтгеривню ойлары нечик гелгени гьакъда хабарлады. Сёйлевюню ахырында Н.Арслановагъа багъышлап язгъан шиърусун охуду, гюл байламлар тапшурду. Школаны директору Камал Камаловну маъналы ва насигьатлы сёзлерине охувчу яшлар, муаллимлер, бары да жыйылгъанлар къулакъасып тынгладылар.
Гьюрметли къонакъ, шаир Нурьяна Арсланова да ахырында Къаягент райондагъы орта школаны муаллимлерини, охувчу яшларыны, бары да жыйылгъанланы оьзюню терен маъналы, яшавубузну гьар якъдан суратлайгъан янгы шиърулары булан таныш этди.
Ёлугъувну ортакъчылары шаирни гьар шиърусуна харс урувлары булан разилигин билдирип къоймай, адабият яратывчулугъунда гележекде уллу уьстюнлюклер ёрадылар.
Магьамматрасул ИБРАГЬИМОВ.
Къаягент район, Къаранайавул юрт.
СУРАТДА: адабият чарадан гёрюнюш.
