Май айны 30-нда Дагъыстан Республиканы Халкъ Жыйыныны 36-нчы сессиясы оьтгерилген. Сессияда депутатлар оьзлени алдына салынгъан 30-гъа ювукъ масъалалагъа къарагъанлар. Сессияны Дагъыстан парламентни спикери Хизри Шихсаитов ачгъан ва юрютген.
Депутатланы тергевюне берилген масъалаланы 15-и федерал законну талапларына гёре гётериле. Халкъны вакиллери оьзлени алдына салынагъан масъалаланы 8-ин ахырынчы охувдан сонг, 11-ин биринчилей охувдан сонг, 6-сын буса эки керен охугъан сонг къабул этгенлер. Къарар чыгъарыв масъалалар да 4 болгъан.
Сессия адатлангъан кююне гёре парламент фракцияланы ёлбашчыларыны сёйлевлеринден сонг башлангъан. Ишге гирише туруп, депутатлар «2018-нчи йылны январ айыны 1-ден 2018-нчи йылны декабр айыны 31-ине ерлиги вакътини ичинде Дагъыстан Республиканы территориясында ерлешген маданият, савлукъ сакълав, билим берив, социал къуллукълар кютеген къурумланы ишини сан янларын белгилейген харлысыз багьагъа гёре гьисап беривге де къарагъанлар.
Сессияны барышында 2020-нчы, 2021-нчи йылланы да гёз алгъа тутуп, 2019-нчу йылгъа Дагъыстан Республиканы бюджетине де алышынывлар этилген.
Депутатланы разилиги булан республикада юрюлеген «150 школа» деген проектни яшавгъа чыгъарылывун дагъы да яхшылашдырмакъ учун, республика бюджетге къошум гьисапда резерв фонддан 180 миллион манат акъча йиберилежек. Шону натижасында дагъы да 20 муниципалитетлеге шо проектде ортакъчылыкъ этмеге имканлыкълар ачыла.
Максим Эсенбиев.
