Бу йылны артдагъы эки айыны ичинде Магьачкъалада яшланы ва оьрюм яшланы арасында ёлларда болгъан 9 хатабалагь гьисапгъа алынгъан. Шоланы натижасында 9 адам зараллангъан.
Яшлар, оьрюм яшлар булан байлавлу ёлларда болагъан аварияланы алдын алмакъ, аманлыкъны сакъламакъ, шогъар байлавлу талапланы яшавгъа чыгъармакъ учун, Магьачкъалада март айны 24-ден апрель айны 8-зи болгъунча, «Тергевлю болугъуз, яшлар!» деген чара оьтгериле.
Шо заманны ичинде ДПС-ни къуллукъчулары аслу гьалда яшланы алып юрюйген транспортну гьайдавчулары оьзлени алдына салынагъан талапланы нечик кютегенине, транспортну чалтлыгъына аслу тергев этежек. Сонг да, ёлларда яяв юрюйгенлеге, ёлдан чыгъагъанлагъа да онгайлы имканлыкълар болажакъ.
Россияны УМВД-сини Магьачкъаладагъы ГИБДД бёлюгюню къуллукъчулары яшланы алып юрюйген транспортну ёл юрюшню низамын бузагъан кемчиликлерин аян этмек учун рейд къайдада чаралар оьтгережеклер.
Россияны УМВД-сини Магьачкъаладагъы ГИБДД бёлюгюню къуллукъчулары гьайдавчуланы ёл юрюшню низамын бузмай, айрокъда билим берив идараланы янындан оьтегенде айрыча тергевлю болмакъгъа чакъыра ва бирдагъы керен эсине сала.
Мурат Жапаров, Россияны УМВД-сини Магьачкъаладагъы ГИБДД бёлюгюню старший инспектору, полицияны майору.
