Алдагъы гюнлерде «Дагестан» деген маълумат агентлигинде республиканы медицина центрны баш врачы Ибрагьим Магьамматов журналистлер булан ёлугъуп, прес-конференция оьтгерди. Шо ёлугъувда аслу гьалда медицина центрны кюрчюсюнде янгы республика больница къурмагъа гёз алгъа тутулгъанны гьакъында сёз юрюлдю.
–Мен янгы ишге гиришген вакътиде, биз коллектив булан бирче центрда медицина къуллукълар нечик кютюлегенине ва экономика гьалына, кадрланы билимлерине, ичинде этилинген алмашынывлагъа байлавлу тергеп чыкъдыкъ, – деп башлады ол оьзюню гиришив сёзюн. – Шо гьаракатыбызны натижасында центрдагъы бёлюклени ишин ёрукъгъа салып, ветеранланы госпиталын да, алдагъы «Министрлер Советини» больницасын да бирлешдирип, янгы 2-нчи республика больница этмеге токъташдыкъ. Медицина къуллукъланы кютюлеген кююн тийишли даражада яхшылашдырмагъа имканлыкълар да бар. Шонда, тарыкъ болса, оьр технологияланы къоллап, медицина якъдан кёмек де этилежек.
Сонг да, янгы бинада онкология, хирургия, урология, гинекология якъдан да оьр технологияланы пайдаландырып, аврувлагъа тарыкълы медицина кёмек болдурулажакъ. Бизин тергевлерибизден сонг бары да якъдан гьалны анализ этип, таклифлерибизни Дагъыстанны савлукъ сакълав министрине де етишдирдик. Ол да бизин мурадыбызны арив гёрюп якълады. Гьалиге хыйлы иш этилинип тура. Гёз алгъа тутулгъан янгы 2-нчи республика больница толу кюйде электрон къайдагъа гёчюп ишлежек. Натижада тезликде аврувланы савлугъуну гьайын этмеге бек онгайлы болажакъ. Мен ёлбашчылыкъ этеген медицина идараны 18 миллион 800 минг борчу бар эди. Шону да биз тёлеп битгенбиз. Гьали болгъанча бизде амалгъа гелмейген операцияланы этип болагъан медицина аппаратлар булан да ясандырылгъан.
Ибрагьим Магьамматов эсгерген кюйде, Россияны Президентини май айдагъы Указына гёре, оьзю ёлбашчылыкъ этеген медицина центрда врачланы айлыгъы – 40 минг, орта ва оьзге медицина, техника къуллукъчуланыки буса – 20 минг манат. Республиканы медицина центрында бугюнлеге ерли 700-ден де артыкъ касбучулар, оьзге къуллукъчулар чалыша.
