Пятница, 27.04.2018г. — «ЁЛДАШ».
Тутушуп ябушувдан Темиркъазыкъ-Кавказ федерал округну гезикли чемпионаты Хасавюртда оьтгерилди. Ярышларда эсгерилген округну алты республикасындан гелип 340 кочап ортакъчылыкъ этген. Дагъыстанны кочаплары 6 биринчи, 5 экинчи ва 14 уьчюнчю ерлени къазандылар.
Округну чемпионуну атын къоркъмаскъалалы, оьзю Магьачкъаладагъы «Динамо» деген хас олимпия спорт школасына юрюйген Зайнулла Къурбанов 97 кило авурлукъда къазанды. Ол финалда Мычыгъыш Республикадан гелген Агьмат Батаевни утма болду.
Къумукъ уланлар къаягентли Шихсайит Жалилов ва магьачкъалалы Исмайыл Гьажиев уьчюнчю ерлеге ес болдулар. Олар уьчевю де июль айда оьтгерилежек Россияны чемпионатында ортакъчылыкъ этежеклер.
