Тюркияны тахшагьары Анкарада ерлешген «Тюрксой» деген тюрк маданиятыны халкъара къуруму чыгъаргъан китапча белгили шаирибиз, инкъылапчыбыз Зайналабит Батырмурзаевни 120 йыллыгъына ва «Ёлдаш» газетни де, «Тангчолпан» журналны да 100 йыллыкъ юбилейлерине багъышлангъан.

Биринчи бетинден башлап, З.Батырмурзаевни яшавуну, инкъылапчы гьаракатыны гьа­къында маълуматлар бериле. Ону яратывчулугъуну гьа­къында айтыла ва «Тангчолпан» деген шиърусу къумукъча да, тюрк тилде де печат этилген. «Кериван гетди» деген шиърусу да шо къайдада берилген.

Китапдагъы тюркиялы алим, профессор Четим Пекажарны къумукъ халкъны тарихи, тили ва культурасына багъышлангъан макъаласы да салынгъан.

Китапчаны ахырынчы бетлеринде «Ёлдаш» газетни ва «Тангчолпан» журналны 100 йыллыгъына байлавлу оланы тарихи ёлу суратлана. Китапчагъа материалланы профессор Четим Пекажар онгаргъан.

Бизин мухбирибиз.