Оюнгъа регламент булан берилген бары да токъсан минутну «Анжи» я чапгъынлыкъда, яда чапгъынлыкъны гьайында йиберди. Биринчи таймны яртысы да гетмеген эди, Амаду Мутари отуз секундну ичинде гол гийирме имканлы эки мюгьлетден пайдаланып болмады. Бизин командагъа яхшы чапгъынчы етмей. Абдуллавов, Сердеров ва Газимагъамматов гьали де кёп жагьил, Шамил Асилдаров буса гьали де яхшы формагъа гирип битмеген, айланышы авур, топ тюшгенде бираз жыйнакъсыз айлана, натижада топну тас эте.
«Балтиканы» футболистлери, оьзлени тренерини оюнгъа берген тапшурувуна гёре бары гючюн салып, оьзлени къапусун сакъламакъны гьайын этди. Алда ойнайгъан бизин бары да футболистлени сакълап, «Балтиканы» футболистлери бизинкилеге экинчи таймда бир сама юз процентли мюгьлет яратма къоймады. Касбучулар ва журналистлер оланы шо къастын яхшы къыйматлады.
«Анжи» биринчи таймны бек арив ойнады, оьрде аты эсгерилген Амаду Мутари къолдан чыгъаргъан эки мюгьлетден къайры, гол гийирме Шамил Асилдаровну, Магьаммат Митришевни, Илья Максимовну имканлыкълары болду. Экинчи тайм олай къужурлу тюгюл эди. Танапусну вакътисинде Ташуев И. Максимовну орнуна С. Сердеровну чыгъаргъан сонг, оюнну «тузу, бурчу» да тайды.
Оюн битгенде прес-конференцияда мен берген: «Максимовну не себепден алышдырдыгъыз?» – деген суалгъа, С. Ташуев булай жавап берди: «Команданы доктору Максимовну бутундан бир къыйыны баргъа шекленди. Тергеп къарагъанда, ону шеклиги герти болуп, ону алышдырма тюшдю», – деди.
Максимовдан къайры бизин составда А. Мутари, А. Гьажибеков ва Г. Чиркин оюнну гючлю ойнады. «Балтиканы» къапучусу Георгий Шелиягъа буса оюнну инг яхшы футболисти деп айтма да ярай. Къонакъланы къалгъан футболистлери де бары да бир йимик арив оюн гёрсетди.
Гелеген оюнну «Анжи» къонакълыкъда, Н. Новгородда «Волга» булан ойнай.
СУРАТДА: къаравчулар оюнда.
Шарабутдин КИШИЕВ.
