Юрт мактапны 1953-нчю йылда 7 класны битдирип, Хасавюртда МТС-ни кюрчюсюнде къурулгъан механизатор курсланы тамамлап, асгерде ватандаш борчун ГДР-де кютюп, ата юртуна къайта. О замангъы Калининни атындагъы колхозну трактор колоннасыны бригадири Нугьбек Алхаматов, инбашына къагъа туруп: «Муна, Изамдин, эсги трактор  сени ихтиярынгда, ярашдырып, авлакъ ишлеге алгъасамасанг болмай, механизатор алтынны орнун тута», – деп англата.

Ишде сынаву ёкъ Изамдин Исаевге башлап тынч болмай. Йыллар бою иш уьст­де чыныкъгъан бай сынавун ол сонгун­да, насигьатчы болуп, яш механизаторлагъа авлакъ ишлени сырын тенг пайлап берип, билмегенин уьйрете.

Арадан  50 йыл гетип, ону иш загьматы башгъалагъа шагьра ёл ва уьлгю болуп токътай. Загьмат ёлунда Изамдин Исаевге 1986-нчы йыл сююнчлю агьвалат бола. Огъар Москвада СССР-ни ВДНХ-сыны ортакъчысы болма насип иржая. Дагъыс­танны Оьр Советини Президиумуну къарары булан огъар 1991-нчи  йыл Гьюрметлев грамота бериле ва ол «Жигули» машин булан савгъатлана.

– Мен буссагьатгъы пакарсыз, башалман замангъа къарап, ишсиз къалгъан яшёрюмлеге языгъым чыгъа, юрегим авурта. Авлакъ майданлар барлакъ басса, бежен  берекетден толмас. Топуракъ ниъмат тюгюлмю бизге рызкъы береген, гийиндиреген, тутгъан мурадыбызгъа етме  кёмек этеген. Немкъорай янашывну натижасы ишден баш къачырыв бола, – дей, кюстюне туруп, Изамдин Исаев.

Насипли агьлюде 5 авлет оьсген, загьмат ёлунда тарбиялангъан, уьй-эшик болуп, яшавдан сююнюп яшайлар.

Ювукъ гюнлени ичинде Изамдин Исаев 77 йыл сюрген оьмюр чагъын  белгилежек. Мен де, абур-сыйгъа лайыкълы механизаторгъа савлукъ ёрай туруп:

Кёкде юлдузунг,

Яна сююнчюнг,

Загьматда къолунг,

Берекет гюнюнг, – деп айтма сюемен.

 

 

 

Зайналабит Басханов.

Ботаюрт, Хасавюрт район.