Муна шолай загьмат оьзюн насипли этген Рабадан Рамазанович Ургуевни гьакъында сёз юрюле. Рабадан Ургуев 1951-нчи йыл Дагъыстан Республиканы Кули районуну Кули юртунда тувгъан, онда орта школаны лап оьр къыйматлагъа битдирип, 1969-нчу йыл Дагъыстан медицина институтну аврувланы багъагъан бёлюгюне охума тюше.
– Докторлукъ сен яшдан берли де сююп сайлагъан касбуму? – деймен.
– Тюгюл, воллагь! Яшда мен уллу иш сурат этме сюе эдим, тек доктор болуп къалдым, – деп иржая Рабадан, – четимлиги кёп иш чи дюр. Буса да, муаллимлерден къолайбыз, – деп иржайывун узата.
– Неге дейсиз? – деп сорайман.
– Докторланы хаталары къабурлагъа гирип яшына, муаллимлени хаталары буса гюн сайын берекетли оьсе ва яшавубузну бары тармакъларын «берекетли безей», – деп ойлу токътай. Сонг бизин заманда охувгъа, билимге гьасиретлик кёп эди, гьали, акъчагъа гьасиретлик артыкъ. Оьр охув ожакъда охугъан алты йылым уллу иш чалт юрюй эди, неге тюгюл шо 6 йылда алмагъа тарыкъ билимни, англама герек затны ахыры-арты ёкъ, теренлиги гёрюнмейген денгиз йимик эди. Инаныгъыз, шо 6 йылны ичинде гёзел Каспий денгизде адамшавлу 6 керен киринмеген бусам ярай. Неге тюгюл, доктор, айрокъда терапевт сав этмеге герек аврувланы эби-саны ёкъ. Шо саялы гюн де, гече де баш гётермей охудукъ. Тюзю, шогъар бир де гьёкюнмеймен. Яш вакътиде алынгъан билим узакъ оьмюрлю бола экен, – дей Рабадан Рамазанович.
1975-нчи йыл Дагъыстан медицина институтну уьстюнлю кюйде битген Ургуев Мычыгъыш-Ингуш Республикагъа бакъдырыла. Грозныйда республика клиника азарханада интернатурадан оьте, сонг Мычыгъыш-Ингуш Рecпубликаны савлукъ сакълав министерлиги Рабадан Рамазановични Гюйдюрмесни район азарханасыны терапевт бёлюгюне бакъдыра. Терен билимли, ишге гьасирет доктор, къасткъылып, ишге гирише, токътамай охуй, иш сынавун илму булан байлап, тергеп ишлей.
– Билим алтындан сыйлы буса да, алтын йимик замангъа чыдап болмай: кемий, аза, аз бола. Ону оьсдюре, уьстюне къоша турмагъа тарыкъ. Оьзюн бираз сама да сыйлайгъан касбучу гьаман ишлеме ва оьсе яшамагъа тарыкъ. Тюзю, шо алым яшда къыйылма тарыкъ. Муна шолай, яшдан башлап китапдан да, ишден де айрылмай турабыз, – дей Рабадан .
1986-нчы йыл буса Р. Ургуев Ленинграддагъы докторланы касбусун камиллешдиреген институтну курсларындан оьтюп къайта ва инамлы кюйде ишин узата.
1993-нчю йыл Р. Ургуевни районну баш терапевти этип белгилейлер. Бу жаваплыгъы артгъан иш ону къастын дагъы да артыкъ гётере. Шагьарда да, савлай районда да билимли доктор, бажарывлу ёлбашчы, гелишли адам гьисапда генг кюйде белгили бола.
2003-нчю йыл Р. Ургуевни Гюйдюрмес район азархананы баш врачыны амбулатория ва поликлиника ишине ёлбашчылыкъ этеген орунбасары этип белгилейлер. Бу ишде Рабадан Рамазановични къурум ишдеги пагьмусу айрокъда яхшы гёрюне: аврувланы къабул этивю, олагъа янашыву, поликлиниканы дарман булан таъмин этивю гётериле, медколлективни ишге янашыву бютюнлей башгъа бола. Шо йыллар район азархананы партия къурумуну секретары ва травматолог болуп ишлеп тургъан борагъанлы Алавдин Анзорович Хубиевге Р. Ургуевни гьакъында сорагъан эдим.
– Яхшы адам, терен билимли касбучу, медколлективни ишге къуруп, ондан низамны талап этип болагъан ёлбашчы эди, – деди ол.
2004-нчю йыл Р. Ургуев Москвадагъы врачланы билимин камиллешдиреген институтда билимин камиллешдирип къайта. Шо йыл районну ва шагьарны савлукъ сакълав тармагъыны бажарывлу касбучусу гьисапда огъар Гюйдюрмес шагьарны гьюрметли ватандашы деген ат бериле. «Гюрмет, сый ерсиз этилсе, есин ер, къастгъа, терге, бажарывлукъгъа гёре этилсе, есин дагъы да оьр этер», – дей бизин халкъ. Тюз де айта. Гьакъыллы адам оьзюне этген абур-сыйны оьзюнe борчгъа берилгендей англай, борчну гьакълашыв безер деп, дагъы да артыкъ ишге бериле. Къаст къачан да къала да къура, есин къаладан да бийикге де гётере. 2006-нчы йылда Рабадан Рамазанович Ургуевге кёп йылланы узагъында савлукъ сакълав тармакъда къасткъылып ва бажарывлу ишлегени саялы «Мычыгъыш Республиканы ат къазангъан врачы» деген гьюрметли ат бериле.
2007-нчи йыл Р. Ургуев Аштархан мединститутну врачланы билимин камиллешдиреген курсларында билимин камиллешдирип къайта ва ишин уьстюнлю кюйде узата.
2011-нчи йыл арза язып, ёлбашчы ишден эркин болуп, шо азарханада участковый врач болуп ишлей. 2012-нчи йылны гюзюнден башлап, Гюйдюрмес районну Дарбанхи (Янгы Борагъан) юртунда шо йыл ачылгъан санаторийде физиотерапия бёлюгюню заведующийи болуп ишлей. Борагъанны эмли сувларыны санаторийине гелегенлени ол къабул эте.
Санаторийге ёлбашчылыкъ этеген Дарбанхидеги республика мий аврувланы баш врачы Гиланий Сатаевден башлап, башгъа къуллукъчуларына етгинче, бары да Р. Ургуевни тергевлю адам, терен билимли доктор деп макътайлар. Оьзю Ургуев саламат адам: «Мен газетлерде макътар чакъы иш этмегенмен, башгъаланы гьакъында языгъыз!» – деп, баянлыкъ бермей, къаршылыкъ къуруп, оьзюне къайта инамлыкъ тувдура. Биз огъар бу ишинде уллу уьстюнлюклер ва оьзюне де яхшы савлукъ ёрайбыз!
Абас Мамаев.
Борагъан юрт.
