Дагъыстан Республиканы районларындагъы, шагьарларындагъы бузулувлар токъталмай. Почта байлавлукълар кёп районларда тозулгъан. Кёп юртларда почта бёлюклер чи нечик де ёкъ, кагъыз ташлама почта ящиклери де ёкъ. Хасавюрт районда 70-ге ювукъ юрт бар, оланы 32-синде совет заманларда 200-ге ювукъ ишлейген адамы булангъы почта бёлюклер бар эди. Жумада алты керен почта машинлер юртлагъа бара эди. Бугюн буса бир зат да ёкъ, барлары да ёкъ йимик.
Бугюн Хасавюрт почтамтгъа Къызылюрт, Хасавюрт шагьарлар, Хасавюрт, Къызылюрт, Новолак, Къазбек районлар гирген.
Дагъыстан Республиканы федеральный почта управлениеси муна 20 йыллар бою Москваны буйрукълары булан ишлей. Дагъыстан Республиканы ёлбашчылары да почтаны къыйынлы гьалын, халкъны почтаны иши рази этмейгенни билсе де, шо гьалгъа уьйренип къалгъан. Халкъланы газетлеге, журналлагъа язылма сюймейгени мен эсгерген затлардан гьасил бола. Халкъны почтагъа инамлыгъы ёкъ. Почталар булангъы арты битмейген булгъавурну арты къачан болажакъ деген сорав арагъа чыгъа.
«Ёлдаш» газетни баш редактору Камил Алиев тюз айта, ёлбашчы болуп къалгъан булан болмай, адамны ичинде ругь да болма герек. Тек не амал, олай ругьлу уланларыбыз ёкъ тюгюл, азлыкъ эте. Боташюрт, Эндирей, Къандавуравул, Къарланюрт, Хамавюрт, Чонтавул, Чагъаротар газетлеге неге языла? Мен олар булан кёп ишлегенмен – баракалла о юртланы халкъына. Олар булан бир тил болуп, янашып ишлеп бажарма тюше.
Къумукъ халкъ анадаш газетине язылмай демек – о Аллагьгъа да уллу болуп барагъан зат. Язылгъан, гьали болгъанча да язылма да, охума да жаны чакъы да сюе. Тек газети заманында къолуна тюшмей. Акъча да берип язылса да, газетни излеп артындан юрюй. Халкъ газетине бек гьасирет экенине инангъанман, инанаман, кёп йыллар ишлеп шогъар мюкюр де болгъанман.
«Ёлдаш» газетини татывун къумукъ халкъ англамай тюгюл. Адамны ожагъына гьар жумагюн бир ажайып, тамаша гьайран арив емиш бав йимик, 24 бетли ичи дарманлы, эмли гьар бетин алып охугъанда береген янгылыкъланы, сююнчлюкню айтып битдирме къыйын. Ондан гьайран емиш адамгъа болурму. Ону охусанг, ятгъан ерингде билиминге – билим, гьакъылынга гьакъыл къошула. Мен кёп йыллар яшасам да, кёпню гёрсем де, ял алмагъа сюйгенде, юрегим бир-бирде дюнья гьалланы, къумукъ халкъны гьалын билме сюйгенде, къалам, кагъыз да алып, «Ёлдаш» газет булан бавума чыгъаман, охуйман. Дюнья гьалын, яшавну талапларын, оюн-дертин билемен. Бу мени учун, уьйде турагъан сакъат адамгъа тюшюп турамы!
Булай четим яшавда ял аламан, къайгъыдан-дертден, дюнья къалмагъаллардан сакъланаман. Газетлени кёп охума сюемен, олагъа языламан, аламан. Олар мени гёнгюмню ачагъан сырдашларым, яшавумну кёмекчилери. Мени эпсиз къувандыра, къартлыгъымны, аврувларымны кюшлей. Уьстевюне, «Ёлдаш» газетни гьали оьзюме агъа де этгенмен. Ондан сыйлы адамым ёкъ.
Гетген охув йылны уланымны къызы 5-ге битдирди. Ана, къумукъ тил дарслардан чы кёп уллу макътавлу кагъыз алды. Бу агьвалат мени айрыча сююндюрмей къоймады. О да мени гележекге умутларымны тирилте. Къызым Абай булан биз «Ёлдаш» газетни ёлундабыз. Ол оьзюню миллет газетин охуй, сюе. Абайгъа анамны атын къойгъанман. Мен «Ёлдаш» газетни гьакъында огъар кёп айтаман. Гьали Абайгъа «Ёлдаш» газетге биринчи макъаласын язмагъа кёмек этме тураман.
Муна 97 йыл «Ёлдаш» газет халкъы учун береген ниъматны оьлчевю ёкъ. Сабий болмагъан къумукъ адам шу сёзлени агьамиятлы экенин англар деп эсиме геле. Газети ёкъ миллет яшлайын бавдагъы гюлдей сёне. Амма гюлю сёнсе, миллетни неси къала. Къумукълагъа къумукъ газети барлыгъы уллу насип тюгюлмю!
Амир АЛИЕВ,
Россияны журналистлерини союзуну члени.
